shayad ho use dard ka ehsas ilahi

shāyad ho use dard kā ehsās ilāhī

kuchh der jo baiThe vo mire paas ilāhī

ab un se bhalā kaisī koī aas ilāhī

jin ko na vafā kā ho koī paas ilāhī

mujh ko mire mahbūb kā dīdār karā de

ab toḌ de nazroñ kā ye upvās ilāhī

ham ne hī nibhāyā hai yahāñ 'ahd-e-vafā bhī

ham ko hī milī dard kī mīrās ilāhī

hoñToñ se lagāyā hai mire yaar ne shāyad

ḳhushbū se mo'attar hai ye qirtās ilāhī

jab zāviya nazroñ kā badal kar use dekhā

patthar se vo lagne lagā almās ilāhī

ab buġhz hai nafrat hai 'adāvat hai diloñ meñ

ab miltā nahīñ logoñ meñ iḳhlās ilāhī

sahrā meñ bhaTaktā hai 'asar' qais ke mānind

miltī hī nahīñ yaar kī bū-bās ilāhī

shayad ho use dard ka ehsas ilahi

kuchh der jo baiThe wo mere pas ilahi

ab un se bhala kaisi koi aas ilahi

jin ko na wafa ka ho koi pas ilahi

mujh ko mere mahbub ka didar kara de

ab toD de nazron ka ye upwas ilahi

hum ne hi nibhaya hai yahan 'ahd-e-wafa bhi

hum ko hi mili dard ki miras ilahi

honTon se lagaya hai mere yar ne shayad

KHushbu se mo'attar hai ye qirtas ilahi

jab zawiya nazron ka badal kar use dekha

patthar se wo lagne laga almas ilahi

ab bughz hai nafrat hai 'adawat hai dilon mein

ab milta nahin logon mein iKHlas ilahi

sahra mein bhaTakta hai 'asar' qais ke manind

milti hi nahin yar ki bu-bas ilahi