shayad jo zahr shahr mein tha kaam kar gaya

shāyad jo zahr shahr meñ thā kaam kar gayā

ḳhud se mile hue bhī zamāna guzar gayā

pāgal koī ik ik se yahī pūchhtā thā kal

ham sab kā ek ghar thā batāo kidhar gayā

sūraj ko janm de ke jhulasne ke vāste

ThanDī sī ret chhoḌ samundar utar gayā

sochā thā apne dil meñ sañvāruñgā maiñ tumheñ

tum aa.e tum ko dekh ke maiñ ḳhud bikhar gayā

jab tak maiñ zindagī ko na samjhā thā jī liyā

jab aa ga.ī samajh meñ to be-maut mar gayā

har shaam kitne dard se dekhā hai ye 'hasan'

sūraj kā ḳhuun pī ke samundar nikhar gayā

shayad jo zahr shahr mein tha kaam kar gaya

KHud se mile hue bhi zamana guzar gaya

pagal koi ek ek se yahi puchhta tha kal

hum sab ka ek ghar tha batao kidhar gaya

suraj ko janm de ke jhulasne ke waste

ThanDi si ret chhoD samundar utar gaya

socha tha apne dil mein sanwarunga main tumhein

tum aae tum ko dekh ke main KHud bikhar gaya

jab tak main zindagi ko na samjha tha ji liya

jab aa gai samajh mein to be-maut mar gaya

har sham kitne dard se dekha hai ye 'hasan'

suraj ka KHun pi ke samundar nikhar gaya