shab Dhali utar gaya phir ishq ka nasha mera

shab Dhalī utar gayā phir ishq kā nasha mirā

kyā huā vo der tak usī ko DhūñDhnā mirā

uljhaneñ tamām umr zaat meñ rahīñ mire

kaash mere haath phir lage koī sirā mirā

mujh se vo sukūn māñgtā hai ye bhī din hai ek

jo tamām umr hī banā rahā ḳhudā mirā

zindagī jo jī ga.ī udāsiyoñ se thī bharī

ye pairahan bhī thā ġhamoñ ke thaan se silā mirā

marsiya jo paḌh sakā na laash par mirī abhī

vo gā rahā hai mahfiloñ meñ ban ke āshnā mirā

saañs luuñ to yuuñ lage koī gunāh kar diyā

ab to koī faisla sunā hī de ḳhudā mirā

shab Dhali utar gaya phir ishq ka nasha mera

kya hua wo der tak usi ko DhunDhna mera

uljhanen tamam umr zat mein rahin mere

kash mere hath phir lage koi sira mera

mujh se wo sukun mangta hai ye bhi din hai ek

jo tamam umr hi bana raha KHuda mera

zindagi jo ji gai udasiyon se thi bhari

ye pairahan bhi tha ghamon ke than se sila mera

marsiya jo paDh saka na lash par meri abhi

wo ga raha hai mahfilon mein ban ke aashna mera

sans lun to yun lage koi gunah kar diya

ab to koi faisla suna hi de KHuda mera