shab-e-alam jo teri yaad ke charagh jale

shab-e-alam jo tirī yaad ke charāġh jale

ham apne aap se tā-der ro.e mil ke gale

tamām lutf thā āzadiyoñ se vābasta

ab is ke baa'd nasheman hazār baar jale

idhar hai manzil-e-jānāñ udhar haiñ dār-o-rasan

ġham-e-hayāt batā ab koī kidhar ko chale

ab aur jaane ġham-e-ishq kyā dukhā.egā

kisī ne naam liyā us kā aur ashk Dhale

qadam qadam pe haiñ kāñTe qadam qadam pe sharār

rah-e-vafā meñ zarā aadmī sañbhal ke chale

hamārā jazba-e-ta.amīr miT nahīñ saktā

chaman meñ apnā nasheman hazār baar chale

nishān us kā miTā.egā kyā koī 'shāriq'

qadam-qadam pe jo naqsh-e-vafā banā ke chale

shab-e-alam jo teri yaad ke charagh jale

hum apne aap se ta-der roe mil ke gale

tamam lutf tha aazadiyon se wabasta

ab is ke ba'd nasheman hazar bar jale

idhar hai manzil-e-jaanan udhar hain dar-o-rasan

gham-e-hayat bata ab koi kidhar ko chale

ab aur jaane gham-e-ishq kya dukhaega

kisi ne nam liya us ka aur ashk Dhale

qadam qadam pe hain kanTe qadam qadam pe sharar

rah-e-wafa mein zara aadmi sanbhal ke chale

hamara jazba-e-tamir miT nahin sakta

chaman mein apna nasheman hazar bar chale

nishan us ka miTaega kya koi 'shaariq'

qadam-qadam pe jo naqsh-e-wafa bana ke chale