shab-e-firaq ka dhoka kabhi sahar ka fareb

shab-e-firāq kā dhokā kabhī sahar kā fareb

kamāl-e-zauq-e-tamāsha hai yā nazar kā fareb

mujhe hayāt kī sarhad se duur le aayā

giraft-e-hosh se pahle tirī nazar kā fareb

ġhubār-e-rāh meñ gum ho ga.e rahīn-e-safar

magar na TuuT sakā phir bhī rāhbar kā fareb

mirī hayāt tirī zulf kī panāh meñ hai

shikast de na sakegā mujhe sahar kā fareb

tirī nazar kā karishma nahīñ to phir kyā hai

taġhayyurāt-e-zamāna ye bahr-o-bar kā fareb

tumhārī anjuman-e-nāz tak mujhe laayā

mirī nigah kā taqāzā mirī nazar kā fareb

hudūd-e-kūcha-e-jānāñ ke mā-sivā 'maikash'

har ek gaam pe miltā hai ḳhair-o-shar kā fareb

shab-e-firaq ka dhoka kabhi sahar ka fareb

kamal-e-zauq-e-tamasha hai ya nazar ka fareb

mujhe hayat ki sarhad se dur le aaya

giraft-e-hosh se pahle teri nazar ka fareb

ghubar-e-rah mein gum ho gae rahin-e-safar

magar na TuT saka phir bhi rahbar ka fareb

meri hayat teri zulf ki panah mein hai

shikast de na sakega mujhe sahar ka fareb

teri nazar ka karishma nahin to phir kya hai

taghayyuraat-e-zamana ye bahr-o-bar ka fareb

tumhaari anjuman-e-naz tak mujhe laya

meri nigah ka taqaza meri nazar ka fareb

hudud-e-kucha-e-jaanan ke ma-siwa 'maikash'

har ek gam pe milta hai KHair-o-shar ka fareb