shab-e-firaq ka mara hun dil-girafta hun

shab-e-firāq kā maarā huuñ dil-girafta huuñ

charāġh-e-tīrah-shabī huuñ maiñ jaltā rahtā huuñ

kabhī kā maar diyā hotā zindagī ne mujhe

ye shukr hai ki maiñ zinda-dilī se zinda huuñ

koī fareb-e-tamannā na jalva aur na ḳhayāl

dayār-e-ishq meñ tanhā thā aur tanhā huuñ

zamāna merī hañsī ko ḳhushī samajhtā hai

maiñ muskurā ke jo ḳhud ko fareb detā huuñ

na sun sakoge ab ash.ār mere ai logo

qalam ko ḳhuuñ meñ Dubo kar maiñ sher kahtā huuñ

ye inqalāb hai kal maiñ ne rah dikhā.ī thī

aur aaj raah meñ ḳhud hī bhaTaktā phirtā huuñ

jadīdiyat kā huuñ shaidā rivāyatoñ kā amiiñ

maiñ imtizāj meñ donoñ ke sher kahtā huuñ

jise na dostī mahbūb aur na pās-e-vafā

us aadmī se hamesha gurez kartā huuñ

'shafīq' mujh ko na ilzām deñ azal se hī

ḳhatā-sarisht hai merī ḳhatā kā putlā huuñ

shab-e-firaq ka mara hun dil-girafta hun

charagh-e-tirah-shabi hun main jalta rahta hun

kabhi ka mar diya hota zindagi ne mujhe

ye shukr hai ki main zinda-dili se zinda hun

koi fareb-e-tamanna na jalwa aur na KHayal

dayar-e-ishq mein tanha tha aur tanha hun

zamana meri hansi ko KHushi samajhta hai

main muskura ke jo KHud ko fareb deta hun

na sun sakoge ab ashaar mere ai logo

qalam ko KHun mein Dubo kar main sher kahta hun

ye inqalab hai kal main ne rah dikhai thi

aur aaj rah mein KHud hi bhaTakta phirta hun

jadidiyat ka hun shaida riwayaton ka amin

main imtizaj mein donon ke sher kahta hun

jise na dosti mahbub aur na pas-e-wafa

us aadmi se hamesha gurez karta hun

'shafiq' mujh ko na ilzam den azal se hi

KHata-sarisht hai meri KHata ka putla hun