shab-e-firaq mein roya kiya sahar ke liye

shab-e-firāq meñ royā kiyā sahar ke liye

taras taras ga.iiñ aaheñ mirī asar ke liye

ilāhī ḳhair se us kī ḳhabar mile mujh ko

chhurī hai tez vahāñ murġh-e-nāma-bar ke liye

bajā hai bose kā gar niil ban gayā ruḳh par

yahī to daaġh munāsib thā us qamar ke liye

marīz-e-hijr ne dī jaan terī ġhaflat se

na aaya ek din o be-ḳhabar ḳhabar ke liye

ziyāda fart-e-nazākat se sargirāñ vo hue

lagā liyā kabhī sandal jo dard-e-sar ke liye

payām us but-e-shīrīñ-adā kā jab laayā

baḌhā ke haath qadam ham ne nāma-bar ke liye

jo mehr-e-hashr mire dāġh-e-dil kā phāhā ho

ravā hai abr kā rūmāl chashm-e-tar ke liye

ḳhayāl-e-zulf meñ din-rāt ham haiñ sargardāñ

azal se thā yahī saudā hamāre sar ke liye

duā.eñ māñgnā hoñ jitnī maañg le 'vahbī'

khulā hai bāb-e-ijābat abhī asar ke liye

shab-e-firaq mein roya kiya sahar ke liye

taras taras gain aahen meri asar ke liye

ilahi KHair se us ki KHabar mile mujh ko

chhuri hai tez wahan murgh-e-nama-bar ke liye

baja hai bose ka gar nil ban gaya ruKH par

yahi to dagh munasib tha us qamar ke liye

mariz-e-hijr ne di jaan teri ghaflat se

na aaya ek din o be-KHabar KHabar ke liye

ziyaada fart-e-nazakat se sargiran wo hue

laga liya kabhi sandal jo dard-e-sar ke liye

payam us but-e-shirin-ada ka jab laya

baDha ke hath qadam hum ne nama-bar ke liye

jo mehr-e-hashr mere dagh-e-dil ka phaha ho

rawa hai abr ka rumal chashm-e-tar ke liye

KHayal-e-zulf mein din-raat hum hain sargardan

azal se tha yahi sauda hamare sar ke liye

duaen mangna hon jitni mang le 'wahbi'

khula hai bab-e-ijabat abhi asar ke liye