shab-e-firaq thi hum zikr-e-yar karte rahe

shab-e-firāq thī ham zikr-e-yār karte rahe

ḳhizāñ se aḳhz nashāt-e-bahār karte rahe

nikal ke phuul se bū ram na kar sake jaise

ham apne aap se aise farār karte rahe

kabhī savāb bhī sarzad huā to be-manshā

kabhī gunāh bhī be-iḳhtiyār karte rahe

jo baat bar-sar-e-mimbar na kar sakā vaa.iz

tumhāre dost vo bālā-e-dār karte rahe

baḌe vasūq se duniyā fareb detī rahī

baḌe ḳhulūs se ham e.atibār karte rahe

tamām umr tirī aarzū rahī ham ko

tamām umr tirā intizār karte rahe

kahāñ ga.e vo nadīmān-e-ḳhās jo 'shaukat'

hamesha ahd-e-vafā ustuvār karte rahe

shab-e-firaq thi hum zikr-e-yar karte rahe

KHizan se aKHz nashat-e-bahaar karte rahe

nikal ke phul se bu ram na kar sake jaise

hum apne aap se aise farar karte rahe

kabhi sawab bhi sarzad hua to be-mansha

kabhi gunah bhi be-iKHtiyar karte rahe

jo baat bar-sar-e-mimbar na kar saka waiz

tumhaare dost wo baala-e-dar karte rahe

baDe wasuq se duniya fareb deti rahi

baDe KHulus se hum eatibar karte rahe

tamam umr teri aarzu rahi hum ko

tamam umr tera intizar karte rahe

kahan gae wo nadiman-e-KHas jo 'shaukat'

hamesha ahd-e-wafa ustuwar karte rahe