shab-e-furqat mein yar-e-jaani ki

shab-e-furqat meñ yār-e-jānī kī

dard-e-pahlū ne mehrbānī kī

muñh dikhāo bahut rahī takrār

arinī aur lan-tarānī kī

jis ko kahte haiñ chaudhvīñ kā chāñd

terī tasvīr hai javānī kī

kamar-e-yār ho ga.ī ġhā.eb

sun ke dhuum apnī nā-tavānī kī

sūrat-e-hāl par hamāre mohr

daaġh ne zaḳhm ne nishānī kī

sair-e-ne.amat se do jahān kī kyā

de ke shabnam ko buuñd paanī kī

ho gayā ishq husn se nāgāh

pūchhte kyā ho nā-gahānī kī

dil-birishta huā jo misl-e-kabāb

maiñ ne turkoñ kī mehmānī kī

lab-e-jāñ-baḳhsh ke qarīb vo ḳhat

sharh hai matn-e-zindagānī kī

gosh-zad hote hī huī dushman

niiñd terī mirī kahānī kī

khīñchte us ġhazāl kī sūrat

chaukḌī bhūltī hai 'mānī' kī

mujh ko biThlā ke yaar sotā hai

āshiqī kī ki pāsbānī kī

rah gayā shauq-e-manzil-e-maqsūd

pā-e-ḳhufta ne sargirānī kī

misl-e-shabnam huuñ sāf-dil qaane

mujh ko dariyā hai buuñd paanī kī

barq chamkī to sarfarāz kiyā

abr aayā to mehrbānī kī

rāhat-e-marg ko na pūchh 'ātish'

na rahī qadr zindagānī kī

shab-e-furqat mein yar-e-jaani ki

dard-e-pahlu ne mehrbani ki

munh dikhao bahut rahi takrar

arini aur lan-tarani ki

jis ko kahte hain chaudhwin ka chand

teri taswir hai jawani ki

kamar-e-yar ho gai ghaeb

sun ke dhum apni na-tawani ki

surat-e-haal par hamare mohr

dagh ne zaKHm ne nishani ki

sair-e-neamat se do jahan ki kya

de ke shabnam ko bund pani ki

ho gaya ishq husn se nagah

puchhte kya ho na-gahani ki

dil-birishta hua jo misl-e-kabab

main ne turkon ki mehmani ki

lab-e-jaan-baKHsh ke qarib wo KHat

sharh hai matn-e-zindagani ki

gosh-zad hote hi hui dushman

nind teri meri kahani ki

khinchte us ghazal ki surat

chaukDi bhulti hai 'mani' ki

mujh ko biThla ke yar sota hai

aashiqi ki ki pasbani ki

rah gaya shauq-e-manzil-e-maqsud

pa-e-KHufta ne sargirani ki

misl-e-shabnam hun saf-dil qane

mujh ko dariya hai bund pani ki

barq chamki to sarfaraaz kiya

abr aaya to mehrbani ki

rahat-e-marg ko na puchh 'atish'

na rahi qadr zindagani ki