shab-e-gham tu hi bata kaise wo ghar jate hain

shab-e-ġham tū hī batā kaise vo ghar jaate haiñ

jin ke mausam bhī bahāroñ meñ bikhar jaate haiñ

ik tarāshe hue patthar se umīdeñ kar ke

kaisī vahshat hai ki ham jaañ se guzar jaate haiñ

ham mizājoñ ke haiñ nāzuk ki faqat jhoñke se

zard pattoñ kī tarah TuuT ke gir jaate haiñ

jab bhī guzre hue lamhoñ kā ḳhayāl aatā hai

kitne mausam mirī āñkhoñ meñ utar jaate haiñ

maiñ to dīvāna huuñ is shahr-e-vafā meñ lekin

jaane kyoñ log mirī aah se Dar jaate haiñ

zindagī terī kaThin rāhoñ pe chalte chalte

ham bhī kyā log haiñ be-maut hī mar jaate haiñ

ham tire shahr meñ lab tishna liye phirte haiñ

ab to lahje bhī yahāñ zahr se bhar jaate haiñ

ab nahīñ ahd-e-vafā kā bhī bharosa 'barham'

zarf khulte haiñ to phir dost bhī mar jaate haiñ

shab-e-gham tu hi bata kaise wo ghar jate hain

jin ke mausam bhi bahaaron mein bikhar jate hain

ek tarashe hue patthar se umiden kar ke

kaisi wahshat hai ki hum jaan se guzar jate hain

hum mizajon ke hain nazuk ki faqat jhonke se

zard patton ki tarah TuT ke gir jate hain

jab bhi guzre hue lamhon ka KHayal aata hai

kitne mausam meri aankhon mein utar jate hain

main to diwana hun is shahr-e-wafa mein lekin

jaane kyon log meri aah se Dar jate hain

zindagi teri kaThin rahon pe chalte chalte

hum bhi kya log hain be-maut hi mar jate hain

hum tere shahr mein lab tishna liye phirte hain

ab to lahje bhi yahan zahr se bhar jate hain

ab nahin ahd-e-wafa ka bhi bharosa 'barham'

zarf khulte hain to phir dost bhi mar jate hain