shab-e-siyah ka aanchal sarak chuka hai bahut

shab-e-siyāh kā āñchal sarak chukā hai bahut

añdherī raat meñ jugnū chamak chukā hai bahut

ra.īs-e-shahr mirā aur imtihān na le

ki mere sabr kā sāġhar chhalak chukā hai bahut

na kaam aa.egī ab sham-e-dil kī tābānī

ta.alluqāt kā sho.ala bhaḌak chukā hai bahut

chale bhī aao ki mil kar manā.eñ jashn-e-bahār

hamāre shauq kā ġhuncha chaTak chukā hai bahut

tumhāre rishte kī ab parvarish nahīñ mumkin

ki mere dil meñ ye kāñTā khaTak chukā hai bahut

milā na kuchh bhī use merī ḳhāmiyoñ kā surāġh

vo merī zaat kī miTTī phaTak chukā hai bahut

batā de manzil-e-maqsūd kā nishāñ us ko

ki apnī raah se insāñ bhaTak chukā hai bahut

usūl-e-mai-kashī 'ma.asūm' ko sikhā.eñ na aap

vo pī chukā hai bahut aur bahak chukā hai bahut

shab-e-siyah ka aanchal sarak chuka hai bahut

andheri raat mein jugnu chamak chuka hai bahut

rais-e-shahr mera aur imtihan na le

ki mere sabr ka saghar chhalak chuka hai bahut

na kaam aaegi ab sham-e-dil ki tabani

talluqat ka shoala bhaDak chuka hai bahut

chale bhi aao ki mil kar manaen jashn-e-bahaar

hamare shauq ka ghuncha chaTak chuka hai bahut

tumhaare rishte ki ab parwarish nahin mumkin

ki mere dil mein ye kanTa khaTak chuka hai bahut

mila na kuchh bhi use meri KHamiyon ka suragh

wo meri zat ki miTTi phaTak chuka hai bahut

bata de manzil-e-maqsud ka nishan us ko

ki apni rah se insan bhaTak chuka hai bahut

usul-e-mai-kashi 'masum' ko sikhaen na aap

wo pi chuka hai bahut aur bahak chuka hai bahut