shab-e-wada jo na wo bani-e-be-dad aaya

shab-e-va.ada jo na vo bānī-e-be-dād aaya

le ke paiġhām-e-ajal dard-e-ḳhudā-dād aaya

tū na aaya na tirā nāvak-e-bedād aaya

kaun sāġhar-kash-e-ḳhūn-e-dil-e-nāshād aaya

āshiyāñ mausam-e-gul meñ jo mujhe yaad aaya

aise naale kiye muñh ko dil-e-sayyād aaya

jab koī kūche se us shoḳh ke dil-shād aaya

maiñ ne khāyā thā jo dhokā vo mujhe yaad aaya

baaġh meñ pesh-e-nazar jab koī shamshād aaya

mujh ko terā qad-e-be-sāya bahut yaad aaya

kaisī āzādī-e-murġhān-e-ḳhush-ilhān-e-chaman

yūñhī be-par kī uḌātā huā sayyād aaya

dil kī chorī kā gumāñ aur karūñ maiñ kis par

na gayā koī na ai bānī-e-be-dād aaya

dekh kar tishna-labī hashr meñ ham rindoñ kī

jām-e-kausar liye jibrīl kā ustād aaya

bāñkpan āshiq-e-dīvāna-e-mizhgāñ ke huzūr

nok kī lene kahāñ nashtar-e-fassād aaya

bevafā ahd-farāmosh sitamgar zālim

haa.e aaya bhī to kis par dil-e-nāshād aaya

iffat-o-sharm-o-hayā ismat-o-nāmūs-o-ġhurūr

kitne pardoñ meñ chhupā husn-e-ḳhudā-dād aaya

saḳht-jānī kā mirī Dar thā kuchh aisā us ko

maan kar nazr shahīdoñ kī vo jallād aaya

tere bīmār-e-shab-e-ġham kī ayādat ke liye

ġhash kabhī aaya kabhī dard-e-ḳhudā-dād aaya

saad kar do sifat-e-chashm meñ matl.a jo likhūñ

mus.haf-e-husn kā mujh ko hai yahī yaad aaya

peshvā.ī ke liye kis kī baḌhī hai rahmat

kaun phailā.e hue dāman-e-fariyād aaya

tum to ġhurbat meñ bhī yaad aaya kiye ho mujh ko

maiñ bhī yārān-e-vatan tum ko kabhī yaad aaya

koh-o-sahrā tire dīvānoñ se ābād rahe

qais-o-vāmiq kabhī aa.e kabhī farhād aaya

mujh ko kushta nigah-e-chashm-e-ināyat se kiyā

qatl ko mīThī chhurī le ke vo jallād aaya

baiThe baiThe tumheñ phir mashq-e-sitam kī sūjhī

tum ko bhūlā huā phir aaj sabaq yaad aaya

ḳhush-qadoñ ne jo kiyā sher-o-suḳhan kā jalsa

tarah hone ke liye misra.a-e-shamshād aaya

pahre paḌte haiñ ajal ke sahar-o-shām yahīñ

dekh ai 'badr' sañbhal kūcha-e-jallād aaya

shab-e-wada jo na wo bani-e-be-dad aaya

le ke paigham-e-ajal dard-e-KHuda-dad aaya

tu na aaya na tera nawak-e-bedad aaya

kaun saghar-kash-e-KHun-e-dil-e-nashad aaya

aashiyan mausam-e-gul mein jo mujhe yaad aaya

aise nale kiye munh ko dil-e-sayyaad aaya

jab koi kuche se us shoKH ke dil-shad aaya

main ne khaya tha jo dhoka wo mujhe yaad aaya

bagh mein pesh-e-nazar jab koi shamshad aaya

mujh ko tera qad-e-be-saya bahut yaad aaya

kaisi aazadi-e-murghan-e-KHush-ilhan-e-chaman

yunhi be-par ki uData hua sayyaad aaya

dil ki chori ka guman aur karun main kis par

na gaya koi na ai bani-e-be-dad aaya

dekh kar tishna-labi hashr mein hum rindon ki

jam-e-kausar liye jibril ka ustad aaya

bankpan aashiq-e-diwana-e-mizhgan ke huzur

nok ki lene kahan nashtar-e-fassad aaya

bewafa ahd-faramosh sitamgar zalim

hae aaya bhi to kis par dil-e-nashad aaya

iffat-o-sharm-o-haya ismat-o-namus-o-ghurur

kitne pardon mein chhupa husn-e-KHuda-dad aaya

saKHt-jaani ka meri Dar tha kuchh aisa us ko

man kar nazr shahidon ki wo jallad aaya

tere bimar-e-shab-e-gham ki ayaadat ke liye

ghash kabhi aaya kabhi dard-e-KHuda-dad aaya

sad kar do sifat-e-chashm mein matla jo likhun

mushaf-e-husn ka mujh ko hai yahi yaad aaya

peshwai ke liye kis ki baDhi hai rahmat

kaun phailae hue daman-e-fariyaad aaya

tum to ghurbat mein bhi yaad aaya kiye ho mujh ko

main bhi yaran-e-watan tum ko kabhi yaad aaya

koh-o-sahra tere diwanon se aabaad rahe

qais-o-wamiq kabhi aae kabhi farhad aaya

mujh ko kushta nigah-e-chashm-e-inayat se kiya

qatl ko miThi chhuri le ke wo jallad aaya

baiThe baiThe tumhein phir mashq-e-sitam ki sujhi

tum ko bhula hua phir aaj sabaq yaad aaya

KHush-qadon ne jo kiya sher-o-suKHan ka jalsa

tarah hone ke liye misra-e-shamshad aaya

pahre paDte hain ajal ke sahar-o-sham yahin

dekh ai 'badr' sanbhal kucha-e-jallad aaya