shab-e-wasl hai bahs hujjat abas

shab-e-vasl hai bahs hujjat abas

ye shikve abas ye shikāyat abas

huā un ko kab e'timād-e-vafā

jatāte rahe ham mohabbat abas

yahāñ ab to kuchh aur sāmān hai

vo aate haiñ bahr-ayādat abas

nasīboñ se apne hai shikva hameñ

kareñ kyuuñ kisī kī shikāyat abas

mirā haal sun kar vo haiñ be-qarār

kiyā kis ne zikr-e-mohabbat abas

falak mar-miToñ se na rakh ye ġhubār

miTā be-kasoñ kī na turbat abas

sunūñgā tirī hosh meñ aa to luuñ

abhī se hai nāseh nasīhat abas

ye parda hasīnoñ ko lāzim na thā

chhupātī haiñ ye achchhī sūrat abas

vo pahle sulūk aap ke yaad haiñ

mire haal par ab ināyat abas

takalluf meñ phir vo kahāñ sādgī

ye ārā.ish-e-husn-o-zīnat abas

'hafīz' is zamīñ meñ kaho sher kam

dikhāo na zor-e-tabī.at abas

shab-e-wasl hai bahs hujjat abas

ye shikwe abas ye shikayat abas

hua un ko kab e'timad-e-wafa

jatate rahe hum mohabbat abas

yahan ab to kuchh aur saman hai

wo aate hain bahr-ayaadat abas

nasibon se apne hai shikwa hamein

karen kyun kisi ki shikayat abas

mera haal sun kar wo hain be-qarar

kiya kis ne zikr-e-mohabbat abas

falak mar-miTon se na rakh ye ghubar

miTa be-kason ki na turbat abas

sununga teri hosh mein aa to lun

abhi se hai naseh nasihat abas

ye parda hasinon ko lazim na tha

chhupati hain ye achchhi surat abas

wo pahle suluk aap ke yaad hain

mere haal par ab inayat abas

takalluf mein phir wo kahan sadgi

ye aaraish-e-husn-o-zinat abas

'hafiz' is zamin mein kaho sher kam

dikhao na zor-e-tabiat abas