shab ke hathon gira aur kahin rah gaya

shab ke hāthoñ girā aur kahīñ rah gayā

chāñd phir be-falak be-zamīñ rah gayā

chalte rahte to milne kā imkān thā

jo jahāñ ruk gayā vo vahīñ rah gayā

ḳhud ko kho.e hue kyā kise DhūñDte

tum kahīñ rah ga.e maiñ kahīñ rah gayā

kaun rakkhe hisāb-e-shab-o-roz jab

shab kahīñ rah ga.ī din kahīñ rah gayā

kho gayā jo bhī zād-e-safar paas thā

ḳhvāb oḌhe hue ik yaqīñ rah gayā

tum mile hī kahāñ milne jaise mujhe

maiñ jahāñ thā vahīñ kā vahīñ rah gayā

sab guzartā gayā sab guzarne diyā

phir bhī kyā kyā na dil ke qarīñ rah gayā

maiñ uThā.e hue ye badan chal paḌā

dil bhī raazī thā phir bhī vahīñ rah gayā

baa'd muddat ke ab sochnā bhī hai kyā

paas kyā rah gayā kyā nahīñ rah gayā

shab ke hathon gira aur kahin rah gaya

chand phir be-falak be-zamin rah gaya

chalte rahte to milne ka imkan tha

jo jahan ruk gaya wo wahin rah gaya

KHud ko khoe hue kya kise DhunDte

tum kahin rah gae main kahin rah gaya

kaun rakkhe hisab-e-shab-o-roz jab

shab kahin rah gai din kahin rah gaya

kho gaya jo bhi zad-e-safar pas tha

KHwab oDhe hue ek yaqin rah gaya

tum mile hi kahan milne jaise mujhe

main jahan tha wahin ka wahin rah gaya

sab guzarta gaya sab guzarne diya

phir bhi kya kya na dil ke qarin rah gaya

main uThae hue ye badan chal paDa

dil bhi raazi tha phir bhi wahin rah gaya

ba'd muddat ke ab sochna bhi hai kya

pas kya rah gaya kya nahin rah gaya