shab KHwab mein dekha tha majnun ko kahin apne

shab ḳhvāb meñ dekhā thā majnūñ ko kahīñ apne

dil se jo karāh uTThī lailā ko liyā tap ne

dekhe tire jalva ko bāmhan kī jo beTī bhī

muñh se vahīñ kalme ko yakbār lage japne

hai jins parī sā kuchh aadam to nahīñ aslan

ik aag lagā dī hai us amard-e-ḳhush-gap ne

is tarah ke milne meñ kyā lutf rahā baaqī

ham us se lage rukne vo ham se lagā chhapne

hañgām-e-suḳhan-sanjī ātish kī zabānī ko

sharminda kiyā ai dil us shoḳh ke gap-shap ne

har amr meñ duniyā ke maujūd jidhar dekho

aadam ko kiyā hairāñ shaitān kī lap-jhap ne

garmī se mire dil kī is mausam-e-sarmā meñ

ye gumbad-e-gardūñ bhī yakbār lagā tapne

rah vādī-e-aiman kī letā huuñ ki ghabrāyā

is dil kī badaulat yaañ mujh ko taraf-e-chap ne

hai ham se bhī ho saktā jo kuchh na kiyā hogā

majnūñ se jafā-kash ne farhād se sar-khap ne

chal haT bhī pare bijlī dil bādaloñ ko le kar

dahlā hai diyā terī talvāroñ kī shap shap ne

kab tak na karāhūñ maiñ naala na bharūñ kyūñ-kar

maiñ kyā karūñ ai 'inshā' ab jī hī lagā khapne

shab KHwab mein dekha tha majnun ko kahin apne

dil se jo karah uTThi laila ko liya tap ne

dekhe tere jalwa ko baamhan ki jo beTi bhi

munh se wahin kalme ko yakbar lage japne

hai jins pari sa kuchh aadam to nahin aslan

ek aag laga di hai us amard-e-KHush-gap ne

is tarah ke milne mein kya lutf raha baqi

hum us se lage rukne wo hum se laga chhapne

hangam-e-suKHan-sanji aatish ki zabani ko

sharminda kiya ai dil us shoKH ke gap-shap ne

har amr mein duniya ke maujud jidhar dekho

aadam ko kiya hairan shaitan ki lap-jhap ne

garmi se mere dil ki is mausam-e-sarma mein

ye gumbad-e-gardun bhi yakbar laga tapne

rah wadi-e-aiman ki leta hun ki ghabraya

is dil ki badaulat yan mujh ko taraf-e-chap ne

hai hum se bhi ho sakta jo kuchh na kiya hoga

majnun se jafa-kash ne farhad se sar-khap ne

chal haT bhi pare bijli dil baadalon ko le kar

dahla hai diya teri talwaron ki shap shap ne

kab tak na karahun main nala na bharun kyun-kar

main kya karun ai 'insha' ab ji hi laga khapne