shab ki aaghosh mein jaga hua ghar kis ka hai

shab kī āġhosh meñ jaagā huā ghar kis kā hai

us pe aaseb nahīñ hai to asar kis kā hai

aisā sailāb ki jangal ko bahā le jaa.e

aise sailāb meñ be-barg shajar kis kā hai

uñgliyoñ meñ utar aa.e haiñ basārat ke rumūz

tīrgī meñ rahe maḳhfī ye hunar kis kā hai

be-charāġhī hī rahī apne gharoñ kī mīrās

raushnī pūchhtī phirtī hai ki dar kis kā hai

vo musāfir to gayā chhoḌ ke yādeñ apnī

kis ko batlā.ūñ ki ye zād-e-safar kis kā hai

tum mirī raah se ho kar nahīñ guzre ho to phir

naqsh-e-pā ye taraf-e-rāhguzar kis kā hai

phir se mad.hosh-e-tamanna ke hue hosh-ba-jā

ham pe 'ābid' ye karam bār-e-digar kis kā hai

shab ki aaghosh mein jaga hua ghar kis ka hai

us pe aaseb nahin hai to asar kis ka hai

aisa sailab ki jangal ko baha le jae

aise sailab mein be-barg shajar kis ka hai

ungliyon mein utar aae hain basarat ke rumuz

tirgi mein rahe maKHfi ye hunar kis ka hai

be-charaghi hi rahi apne gharon ki miras

raushni puchhti phirti hai ki dar kis ka hai

wo musafir to gaya chhoD ke yaaden apni

kis ko batlaun ki ye zad-e-safar kis ka hai

tum meri rah se ho kar nahin guzre ho to phir

naqsh-e-pa ye taraf-e-rahguzar kis ka hai

phir se madhosh-e-tamanna ke hue hosh-ba-ja

hum pe 'abid' ye karam bar-e-digar kis ka hai