shab ki dahliz se kis hath ne phenka patthar

shab kī dahlīz se kis haath ne pheñkā patthar

ho gayā sub.h kā mahkā huā chehra patthar

kuchh anokhī to nahīñ merī mohabbat kī shikast

aa.ine jab bhī muqābil hue jiitā patthar

is tilismāt kī vaadī meñ palaT kar bhī na dekh

varna ho jā.egā ḳhud terā sarāpā patthar

yaad kī lahr bahā laa.ī hai kis des mujhe

hai yahāñ vaqt kā bahtā huā dariyā patthar

kis ke paikar meñ samātā mire ehsās kā loch

maiñ ne insāñ se ḳhajil ho ke tarāshā patthar

terī āñkhoñ meñ abhī niiñd ke Dore kyuuñ haiñ

yaañ to ik choT se ho jaate haiñ biinā patthar

kund kar detā hai yuuñ zehan ko hālāt kā zahr

jaise ban jaa.e chamaktā huā sonā patthar

terī sochoñ kī qasam ai mire ḳhāmosh ḳhudā

mujh se karte haiñ itā.at kā taqāzā patthar

mujh se māyūs na palTe mirī taqdīr ke ġham

merī uñglī meñ na thā koī chamaktā patthar

kitnī dildār hai sāhil kī chamaktī huī ret

ab nahīñ pāñv-tale koī nukīlā patthar

maiñ sar-e-dār khaḌā huuñ ka.ī sadiyoñ se 'jalīl'

kaun māregā mire jism pe pahlā patthar

shab ki dahliz se kis hath ne phenka patthar

ho gaya subh ka mahka hua chehra patthar

kuchh anokhi to nahin meri mohabbat ki shikast

aaine jab bhi muqabil hue jita patthar

is tilismat ki wadi mein palaT kar bhi na dekh

warna ho jaega KHud tera sarapa patthar

yaad ki lahr baha lai hai kis des mujhe

hai yahan waqt ka bahta hua dariya patthar

kis ke paikar mein samata mere ehsas ka loch

main ne insan se KHajil ho ke tarasha patthar

teri aankhon mein abhi nind ke Dore kyun hain

yan to ek choT se ho jate hain bina patthar

kund kar deta hai yun zehan ko haalat ka zahr

jaise ban jae chamakta hua sona patthar

teri sochon ki qasam ai mere KHamosh KHuda

mujh se karte hain itaat ka taqaza patthar

mujh se mayus na palTe meri taqdir ke gham

meri ungli mein na tha koi chamakta patthar

kitni dildar hai sahil ki chamakti hui ret

ab nahin panw-tale koi nukila patthar

main sar-e-dar khaDa hun kai sadiyon se 'jalil'

kaun marega mere jism pe pahla patthar