shab ki palkon pe hun Thahre hue aansu ki tarah

shab kī palkoñ pe huuñ Thahre hue aañsū kī tarah

sub.h hote hī maiñ kho jā.ūñgā jugnū kī tarah

dekh saktā nahīñ mahsūs to kar saktā huuñ

mujh meñ tahlīl huā hai koī ḳhushbū kī tarah

raqs kartā hai mire dil ke shabistāñ meñ koī

aur sadā aatī hai bajte hue ghuñghrū kī tarah

merī ḳhushbū hī pareshān kiye hai mujh ko

dil ke sahrā meñ bhaTaktā huuñ maiñ aahū kī tarah

mere hālāt hī ḳhud mujh ko banā dete haiñ

kabhī sho.ala kabhī shabnam kabhī aañsū kī tarah

ḳhalvat-e-shab ho ki jalvat kī hasīñ mahfil ho

ham ne mahsūs kiyā hai use ḳhushbū kī tarah

dhuup meñ aatā hai jab us kā tasavvur 'afzal'

mere ehsās pe chhā jaatā hai gesū kī tarah

shab ki palkon pe hun Thahre hue aansu ki tarah

subh hote hi main kho jaunga jugnu ki tarah

dekh sakta nahin mahsus to kar sakta hun

mujh mein tahlil hua hai koi KHushbu ki tarah

raqs karta hai mere dil ke shabistan mein koi

aur sada aati hai bajte hue ghunghru ki tarah

meri KHushbu hi pareshan kiye hai mujh ko

dil ke sahra mein bhaTakta hun main aahu ki tarah

mere haalat hi KHud mujh ko bana dete hain

kabhi shoala kabhi shabnam kabhi aansu ki tarah

KHalwat-e-shab ho ki jalwat ki hasin mahfil ho

hum ne mahsus kiya hai use KHushbu ki tarah

dhup mein aata hai jab us ka tasawwur 'afzal'

mere ehsas pe chha jata hai gesu ki tarah