shab ki sari raushni ko raegan karti hui

shab kī saarī raushnī ko rā.egāñ kartī huī

ho ga.ī ruḳhsat havā sham'eñ dhuāñ kartī huī

mujh ko apne aap se bhī bad-gumāñ kartī huī

zindagī achchhī lagī kār-e-ziyāñ kartī huī

is tarah guzrī hai mere paas se yādoñ kī dhuup

barf thā maiñ vo mujhe āb-e-ravāñ kartī huī

ye tirī chashm-e-ġhazālāñ terī mastāna ravish

ik tavānā jism ko bhī nā-tavāñ kartī huī

maiñ ne dekhā hai vo dāman bhī jise kal nīm-shab

do sitāra-sāz āñkheñ āsmāñ kartī huī

jaane kaisī dhuup thī mere rag-o-pai meñ 'ziyā'

gulshan-e-dil ke har ik gul ko ḳhizāñ kartī huī

shab ki sari raushni ko raegan karti hui

ho gai ruKHsat hawa sham'en dhuan karti hui

mujh ko apne aap se bhi bad-guman karti hui

zindagi achchhi lagi kar-e-ziyan karti hui

is tarah guzri hai mere pas se yaadon ki dhup

barf tha main wo mujhe aab-e-rawan karti hui

ye teri chashm-e-ghazalan teri mastana rawish

ek tawana jism ko bhi na-tawan karti hui

main ne dekha hai wo daman bhi jise kal nim-shab

do sitara-saz aankhen aasman karti hui

jaane kaisi dhup thi mere rag-o-pai mein 'ziya'

gulshan-e-dil ke har ek gul ko KHizan karti hui