shab ki tanhai mein yaad unki satati kyon hai

shab kī tanhā.ī meñ yaad un kī satātī kyoñ hai

merī jaltī huī āñkhoñ ko rulātī kyoñ hai

rūThne ke sivā kuchh aur bahāna bhī na thā

terī 'ādat ye mire dil ko jalātī kyoñ hai

saare afsāne ko sun kar bhī tasallī na huī

ik ġhazal terī mire dil ko lubhātī kyoñ hai

mere hālāt pe ro de ye zarūrī hai magar

zindagī merī zamāne ko hañsātī kyoñ hai

ek muddat huī ā.īna na dekhā maiñ ne

un kī tasvīr mire sāmne aatī kyoñ hai

aap har roz mire dar se guzarte haiñ magar

be-ruḳhī merī tarah aap ko bhātī kyoñ hai

ye to mausam koī patjhaḌ kā nahīñ hai 'afsar'

phir mire dil kī kalī ashk bahātī kyoñ hai

shab ki tanhai mein yaad un ki satati kyon hai

meri jalti hui aankhon ko rulati kyon hai

ruThne ke siwa kuchh aur bahana bhi na tha

teri 'adat ye mere dil ko jalati kyon hai

sare afsane ko sun kar bhi tasalli na hui

ek ghazal teri mere dil ko lubhati kyon hai

mere haalat pe ro de ye zaruri hai magar

zindagi meri zamane ko hansati kyon hai

ek muddat hui aaina na dekha main ne

un ki taswir mere samne aati kyon hai

aap har roz mere dar se guzarte hain magar

be-ruKHi meri tarah aap ko bhati kyon hai

ye to mausam koi patjhaD ka nahin hai 'afsar'

phir mere dil ki kali ashk bahati kyon hai