shab ne kya khol diye apne mahakte gesu

shab ne kyā khol diye apne mahakte gesū

phir se yādoñ ke bahakne lage pāgal jugnū

kuchh ta.ajjub nahīñ ruk jaa.e havā kī dhaḌkan

kohr sī kohr hai phailī huī ab to har-sū

muddatoñ pahle kabhī barse the dil par patthar

aaj tak dīda-e-ehsās se bahtā hai lahū

āriz-e-shab pe jhalaktī hai yuuñ tāroñ kī laḌī

jaise tanhā.ī kī āñkhoñ meñ ḳhushī ke aañsū

dasht-e-taḳh.īl vo sahrā-e-junūñ hai 'at.har'

sirf lafzoñ kā jahāñ chal nahīñ saktā jaadū

shab ne kya khol diye apne mahakte gesu

phir se yaadon ke bahakne lage pagal jugnu

kuchh tajjub nahin ruk jae hawa ki dhaDkan

kohr si kohr hai phaili hui ab to har-su

muddaton pahle kabhi barse the dil par patthar

aaj tak dida-e-ehsas se bahta hai lahu

aariz-e-shab pe jhalakti hai yun taron ki laDi

jaise tanhai ki aankhon mein KHushi ke aansu

dasht-e-taKHil wo sahra-e-junun hai 'athar'

sirf lafzon ka jahan chal nahin sakta jadu