shab-o-roz raqs-e-visal tha so nahin raha

shab-o-roz raqs-e-visāl thā so nahīñ rahā

kabhī tujh ko merā ḳhayāl thā so nahīñ rahā

vo jo be-qarāri-e-jān-o-dil thī nahīñ rahī

vo jo hijr terā muhāl thā so nahīñ rahā

kabhī aañkh meñ jo muravvateñ thiiñ fanā huiiñ

pas-e-chashm ashk-e-malāl thā so nahīñ rahā

ye to e'tirāf-e-shikast hai ki mazīd ab

koī mahram-e-mah-o-sāl thā so nahīñ rahā

vo ki chāñd jis pe kabhī ġhurūb nahīñ huā

yahāñ ik vo shahr-e-jamāl thā so nahīñ rahā

mujhe aisā lagtā hai jaise aañkh se ḳhvāb kā

vo jo rābta sā bahāl thā so nahīñ rahā

mujhe qatl kar ke mo.āmla nahīñ hogā ḳhatm

ki jo qatl pahle kamāl thā so nahīñ rahā

mirā e'tibār adam vajūd se uTh gayā

vo jo zindagī kī misāl thā so nahīñ rahā

shab-e-māhtāb meñ raat ghaTne ke saath saath

jo samundaroñ meñ ubaal thā so nahīñ rahā

hai ajab mashaqqat-e-vasl jis kī thakan se qabl

ye badan thakan se niDhāl thā so nahīñ rahā

shab-o-roz raqs-e-visal tha so nahin raha

kabhi tujh ko mera KHayal tha so nahin raha

wo jo be-qarari-e-jaan-o-dil thi nahin rahi

wo jo hijr tera muhaal tha so nahin raha

kabhi aankh mein jo murawwaten thin fana huin

pas-e-chashm ashk-e-malal tha so nahin raha

ye to e'tiraf-e-shikast hai ki mazid ab

koi mahram-e-mah-o-sal tha so nahin raha

wo ki chand jis pe kabhi ghurub nahin hua

yahan ek wo shahr-e-jamal tha so nahin raha

mujhe aisa lagta hai jaise aankh se KHwab ka

wo jo rabta sa bahaal tha so nahin raha

mujhe qatl kar ke moamla nahin hoga KHatm

ki jo qatl pahle kamal tha so nahin raha

mera e'tibar adam wajud se uTh gaya

wo jo zindagi ki misal tha so nahin raha

shab-e-mahtab mein raat ghaTne ke sath sath

jo samundaron mein ubaal tha so nahin raha

hai ajab mashaqqat-e-wasl jis ki thakan se qabl

ye badan thakan se niDhaal tha so nahin raha