shab samne khaDi hai ujalon ka qad baDha

shab sāmne khaḌī hai ujāloñ kā qad baḌhā

dushman baḌheñ to chāhne vāloñ kā qad baḌhā

piine ke saath saath baḌhegī ye pyaas aur

sahbā ko tez kar ke piyāloñ kā qad baḌhā

apnī hudūd-e-nūr ko paiham vasī.a kar

tū chāñd ban chukā hai to hāloñ kā qad baḌhā

dekhā unheñ to apnī nigāheñ sañvar ga.iiñ

un se jo baat kī to ḳhayāloñ kā qad baḌhā

tujh ko agar lahū kī hifāzat aziiz hai

apnī ġhizā meñ paak nivāloñ kā qad baḌhā

tiflāna shoḳhiyoñ kā tujhe kyā javāb duuñ

bāliġh ho aur apne savāloñ kā qad baḌhā

terī baqā hai tere hunar hī meñ ab 'qamar'

jāda-ba-jāda apne kamāloñ kā qad baḌhā

shab samne khaDi hai ujalon ka qad baDha

dushman baDhen to chahne walon ka qad baDha

pine ke sath sath baDhegi ye pyas aur

sahba ko tez kar ke piyalon ka qad baDha

apni hudud-e-nur ko paiham wasia kar

tu chand ban chuka hai to haalon ka qad baDha

dekha unhen to apni nigahen sanwar gain

un se jo baat ki to KHayalon ka qad baDha

tujh ko agar lahu ki hifazat aziz hai

apni ghiza mein pak niwalon ka qad baDha

tiflana shoKHiyon ka tujhe kya jawab dun

baaligh ho aur apne sawalon ka qad baDha

teri baqa hai tere hunar hi mein ab 'qamar'

jada-ba-jada apne kamalon ka qad baDha