shabab aagin sharab-e-arghawan malum hoti hai

shabāb āgīñ sharāb-e-arġhavāñ ma.alūm hotī hai

ye shām-e-mai-kada kitnī javāñ ma.alūm hotī hai

yahāñ mahsūs hotī hai yahāñ ma.alūm hotī hai

ḳhalish ḳhār-e-mohabbat kī kahāñ ma.alūm hotī hai

ye kab muhtāj-e-tashrīh-o-bayāñ ma.alūm hotī hai

mohabbat aap apnī tarjumāñ ma.alūm hotī hai

ravāñ mālūm hotī hai davāñ mālūm hotī hai

mohabbat mauj-e-bahr-e-be-karāñ ma.alūm hotī hai

rahīn-e-minnat-e-husn-e-butāñ ma.alūm hotī hai

zamīn-e-kū-e-jānāñ āsmāñ ma.alūm hotī hai

nihāñ mālūm hotī hai ayaañ ma.alūm hotī hai

mohabbat bhī ḳhudā-e-do-jahāñ mālūm hotī hai

mohabbat ibtidā apnī mohabbat intihā apnī

mohabbat hāsil-e-kaun-o-makāñ ma.alūm hotī hai

nahīñ koī bhī dil aisā banā.e jis meñ ghar apnā

mohabbat in dinoñ be-ḳhānumāñ mālūm hotī hai

mohabbat ko kabhī pāband-e-īn-o-āñ nahīñ paatā

mohabbat be-niyāz-e-īñ-o-āñ ma.alūm hotī hai

sunā farhād kā qissa sunā majnūñ kā afsāna

kahā to ye kahā sab dāstāñ mālūm hotī hai

na farq aayā azal se zīnat-e-gulzār-e-hastī meñ

bahār is kī bahār-e-jāvedāñ mālūm hotī hai

abhī chashm-e-qubūl is kī taraf maa.il nahīñ shāyad

abhī har sa.ī sa.ī-e-rā.igāñ ma.alūm hotī hai

ye ḳhush-fahmī hai apnī yā nigāh-e-nāz kā jaadū

nahīñ bhī ab to zālim terī haañ mālūm hotī hai

zabāñ 'tālib' kī Taksālī jo paa.ī sab ne farmāyā

ye ḳhās-ul-ḳhās dillī kī zabāñ ma.alūm hotī hai

shabab aagin sharab-e-arghawan malum hoti hai

ye sham-e-mai-kada kitni jawan malum hoti hai

yahan mahsus hoti hai yahan malum hoti hai

KHalish KHar-e-mohabbat ki kahan malum hoti hai

ye kab muhtaj-e-tashrih-o-bayan malum hoti hai

mohabbat aap apni tarjuman malum hoti hai

rawan malum hoti hai dawan malum hoti hai

mohabbat mauj-e-bahr-e-be-karan malum hoti hai

rahin-e-minnat-e-husn-e-butan malum hoti hai

zamin-e-ku-e-jaanan aasman malum hoti hai

nihan malum hoti hai ayan malum hoti hai

mohabbat bhi KHuda-e-do-jahan malum hoti hai

mohabbat ibtida apni mohabbat intiha apni

mohabbat hasil-e-kaun-o-makan malum hoti hai

nahin koi bhi dil aisa banae jis mein ghar apna

mohabbat in dinon be-KHanuman malum hoti hai

mohabbat ko kabhi paband-e-in-o-an nahin pata

mohabbat be-niyaz-e-in-o-an malum hoti hai

suna farhad ka qissa suna majnun ka afsana

kaha to ye kaha sab dastan malum hoti hai

na farq aaya azal se zinat-e-gulzar-e-hasti mein

bahaar is ki bahaar-e-jawedan malum hoti hai

abhi chashm-e-qubul is ki taraf mail nahin shayad

abhi har sai sai-e-raigan malum hoti hai

ye KHush-fahmi hai apni ya nigah-e-naz ka jadu

nahin bhi ab to zalim teri han malum hoti hai

zaban 'talib' ki Taksali jo pai sab ne farmaya

ye KHas-ul-KHas dilli ki zaban malum hoti hai