shabnam se likhun ashkon se likhun main dil ki kahani kaise likhun

shabnam se likhūñ ashkoñ se likhūñ maiñ dil kī kahānī kaise likhūñ

phūloñ pe likhūñ hāthoñ pe likhūñ hoñToñ kī zabānī kaise likhūñ

har samt yahāñ hai ret abhī kis tarah chalūñ tā-umr yahāñ

is ret pe bante naqsh nahīñ ab apnī nishānī kaise likhūñ

ye uljhan to bas uljhan hai kuchh paanā hai kuchh khonā hai

sāhil kī tamannā karte hue maujoñ kī ravānī kaise likhūñ

kyuuñ ret pe DhūñDhte phirte ho ab haath na aa.egā ye sarāb

ye baat haqīqat hai lekin maiñ dil kī zabānī kaise likhūñ

haiñ dil kī bāteñ yuuñ to bahut kuchh kahnā hai kuchh sunñā hai

is kāġhaz ke ek TukḌe par maiñ apnī kahānī kaise likhūñ

har daur nayā hai baat na.ī māyūs nahīñ hai phir bhī 'kiran'

in bichhḌe hue añdhiyāroñ kī hai baat purānī kaise likhūñ

shabnam se likhun ashkon se likhun main dil ki kahani kaise likhun

phulon pe likhun hathon pe likhun honTon ki zabani kaise likhun

har samt yahan hai ret abhi kis tarah chalun ta-umr yahan

is ret pe bante naqsh nahin ab apni nishani kaise likhun

ye uljhan to bas uljhan hai kuchh pana hai kuchh khona hai

sahil ki tamanna karte hue maujon ki rawani kaise likhun

kyun ret pe DhunDhte phirte ho ab hath na aaega ye sarab

ye baat haqiqat hai lekin main dil ki zabani kaise likhun

hain dil ki baaten yun to bahut kuchh kahna hai kuchh sunna hai

is kaghaz ke ek TukDe par main apni kahani kaise likhun

har daur naya hai baat nai mayus nahin hai phir bhi 'kiran'

in bichhDe hue andhiyaron ki hai baat purani kaise likhun