shabnami peDon mein koi zindagi ke git gae

shabnamī peḌoñ meñ koī zindagī ke giit gaa.e

sabz dariyā meñ nahā.e aur ḳhushī ke giit gaa.e

tairte hoñ do parinde narm lahroñ par ḳhushī se

jhiil meñ koī savere raushnī ke giit gaa.e

lauT kar aa.eñ shagufta bāliyoñ par nannhī chiḌiyāñ

lahlahā.e fasl gaañv zindagī ke giit gaa.e

āfrīñ kūñjoñ ko hai jo duur se aatī haiñ varna

kaun manzil par pahuñch kar vāpsī ke giit gaa.e

shaam kī vīrāñ saḌak par koī dīvāna musāfir

shahr kī had se nikal kar ḳhāmushī ke giit gaa.e

dhuup mausam kī sameTe pur-sukūñ bargad kā saaya

raushnī kī shaal oḌhe aadmī ke giit gaa.e

koī jangal kā muġhannī dard ke mausam meñ 'rāshid'

zard peḌoñ se lipaT kar tāzgī ke giit gaa.e

shabnami peDon mein koi zindagi ke git gae

sabz dariya mein nahae aur KHushi ke git gae

tairte hon do parinde narm lahron par KHushi se

jhil mein koi sawere raushni ke git gae

lauT kar aaen shagufta baaliyon par nannhi chiDiyan

lahlahae fasl ganw zindagi ke git gae

aafrin kunjon ko hai jo dur se aati hain warna

kaun manzil par pahunch kar wapsi ke git gae

sham ki viran saDak par koi diwana musafir

shahr ki had se nikal kar KHamushi ke git gae

dhup mausam ki sameTe pur-sukun bargad ka saya

raushni ki shaal oDhe aadmi ke git gae

koi jangal ka mughanni dard ke mausam mein 'rashid'

zard peDon se lipaT kar tazgi ke git gae