shafaq ko nezon pe KHun ki talash hai kyon hai

shafaq ko nezoñ pe ḳhuuñ kī talāsh hai kyoñ hai

falak tujhe bhī sutūñ kī talāsh hai kyoñ hai

lagī hai dil pe to phir maan kyoñ nahīñ lete

tumhārī 'aql ko kyoñ kī talāsh hai kyoñ hai

vo fitna-gar ki jise log 'ishq kahte haiñ

use junūñ meñ sukūñ kī talāsh hai kyoñ hai

nahīñ jo tāb-e-nazar diid kī tamanna kyoñ

nigāh-e-shauq fusūñ kī talāsh hai kyoñ hai

safīna mauj talātum ki sāhiloñ kī Dhalān

sabhī ko josh-e-junūñ kī talāsh hai kyoñ hai

uThā bhī saktā hai parda vo chaah jaa.e agar

use bhī kun-fayakūñ kī talāsh hai kyoñ hai

nishān-e-sajda to zāhir hai hai nahīñ 'maḳhfī'

yaqīñ ko hāl-e-darūñ kī talāsh hai kyoñ hai

shafaq ko nezon pe KHun ki talash hai kyon hai

falak tujhe bhi sutun ki talash hai kyon hai

lagi hai dil pe to phir man kyon nahin lete

tumhaari 'aql ko kyon ki talash hai kyon hai

wo fitna-gar ki jise log 'ishq kahte hain

use junun mein sukun ki talash hai kyon hai

nahin jo tab-e-nazar did ki tamanna kyon

nigah-e-shauq fusun ki talash hai kyon hai

safina mauj talatum ki sahilon ki Dhalan

sabhi ko josh-e-junun ki talash hai kyon hai

uTha bhi sakta hai parda wo chah jae agar

use bhi kun-fayakun ki talash hai kyon hai

nishan-e-sajda to zahir hai hai nahin 'maKHfi'

yaqin ko haal-e-darun ki talash hai kyon hai