shagufta ho ke baiThe the wo apne be-qararon mein

shagufta ho ke baiThe the vo apne be-qarāroñ meñ

taḌap bijlī kī paidā ho ga.ī phūloñ ke hāroñ meñ

kiyā andher apne rañj ne un kī kudūrat ne

bujhī sham-e-mohabbat haa.e do dil ke ġhubāroñ meñ

shab-e-furqat ko zāhid se sivā mar-mar ke kaaTā hai

kare mash.hūr ham ko bhī ḳhudā shab-zinda-dāroñ meñ

ye kis ne kushta-e-teġh-e-tabassum kar diyā mujh ko

mubārakbād kā ġhul ho rahā hai sogvāroñ meñ

vo ishrat jis kā sab sāmāñ hai dil meñ ho nahīñ saktī

mirī majbūriyoñ ko dekhiye un iḳhtiyāroñ meñ

hameñ vo Dhab jo aa jaatā tumhīñ par āzmāte ham

dil-e-ushshāq tum kyā kah ke lete ho ishāroñ meñ

'safīr' ab bas karo kab tak sar-e-shorīda zaanū par

ġhazal kī fikr kyuuñ kar ho sakegī intishāroñ meñ

shagufta ho ke baiThe the wo apne be-qararon mein

taDap bijli ki paida ho gai phulon ke haaron mein

kiya andher apne ranj ne un ki kudurat ne

bujhi sham-e-mohabbat hae do dil ke ghubaron mein

shab-e-furqat ko zahid se siwa mar-mar ke kaTa hai

kare mashhur hum ko bhi KHuda shab-zinda-daron mein

ye kis ne kushta-e-tegh-e-tabassum kar diya mujh ko

mubarakbaad ka ghul ho raha hai sogwaron mein

wo ishrat jis ka sab saman hai dil mein ho nahin sakti

meri majburiyon ko dekhiye un iKHtiyaron mein

hamein wo Dhab jo aa jata tumhin par aazmate hum

dil-e-ushshaq tum kya kah ke lete ho ishaaron mein

'safir' ab bas karo kab tak sar-e-shorida zanu par

ghazal ki fikr kyun kar ho sakegi intishaaron mein