shahr ka shahr jala aur ujala na hua

shahr kā shahr jalā aur ujālā na huā

sāneha kyā ye muqaddar kā nirālā na huā

hai faqat naam ko āzādī-e-izhār-e-ḳhayāl

varna kab kis ke laboñ par yahāñ taalā na huā

TūTte shīshe ko dekhā hai zamāne bhar ne

dil ke TukḌoñ kā koī dekhne vaalā na huā

jis ne parkhā unheñ vo thī koī be-jān machine

dil ke zaḳhmoñ kā bashar dekhne vaalā na huā

kis qadar yās-zada hai ye hisār-e-zulmat

dil jalā.e bhī to har samt ujālā na huā

dasht-e-ġhurbat ke safar kī ye aziyyat-nākī

ḳhushk talvoñ kā abhī ek bhī chhālā na huā

zabt kā had se guzar jaanā yahī hai 'aḳhtar'

dil sulagtā hai magar hoñToñ pe naala na huā

shahr ka shahr jala aur ujala na hua

saneha kya ye muqaddar ka nirala na hua

hai faqat nam ko aazadi-e-izhaar-e-KHayal

warna kab kis ke labon par yahan tala na hua

TuTte shishe ko dekha hai zamane bhar ne

dil ke TukDon ka koi dekhne wala na hua

jis ne parkha unhen wo thi koi be-jaan machine

dil ke zaKHmon ka bashar dekhne wala na hua

kis qadar yas-zada hai ye hisar-e-zulmat

dil jalae bhi to har samt ujala na hua

dasht-e-ghurbat ke safar ki ye aziyyat-naki

KHushk talwon ka abhi ek bhi chhaala na hua

zabt ka had se guzar jaana yahi hai 'aKHtar'

dil sulagta hai magar honTon pe nala na hua