shahr-e-afat mein hangama-e-zindan hai bahut

shahr-e-āfāt meñ hañgāma-e-zindāñ hai bahut

ishq par ab bhī musallat ġham-e-daurāñ hai bahut

ab kisī taur mujhe chhū na sakegā tirā ġham

ab mire chāroñ taraf halqa-e-yārāñ hai bahut

log hote chale jaate haiñ nigāhoñ se pare

lekin ik zehn meñ vāzeh ruḳh-e-tābāñ hai bahut

mustanad kaun se pairā.e haiñ sheroñ ke liye

ye parakhne ke liye miir kā dīvāñ hai bahut

pyaar to pyaar kudūrat bhī kahāñ rakhtā hai

mujhe bhī is kī tarah shikva-e-insāñ hai bahut

juz mire chhīn gayā hai dar-o-dīvār-o-fasīl

'soz' is baar to kam-zarfī-e-tūfāñ hai bahut

shahr-e-afat mein hangama-e-zindan hai bahut

ishq par ab bhi musallat gham-e-dauran hai bahut

ab kisi taur mujhe chhu na sakega tera gham

ab mere chaaron taraf halqa-e-yaran hai bahut

log hote chale jate hain nigahon se pare

lekin ek zehn mein wazeh ruKH-e-taban hai bahut

mustanad kaun se pairae hain sheron ke liye

ye parakhne ke liye mir ka diwan hai bahut

pyar to pyar kudurat bhi kahan rakhta hai

mujhe bhi is ki tarah shikwa-e-insan hai bahut

juz mere chhin gaya hai dar-o-diwar-o-fasil

'soz' is bar to kam-zarfi-e-tufan hai bahut