شہر دل کاش کہ اک شہر تمنا ہوتا

شہر دل کاش کہ اک شہر تمنا ہوتا

یار اس دشت میں کوئی تو سہارا ہوتا

میں ترے شہر سے گزرا ہوں تو ہنگامہ ہوا

گر ترے پاس ٹھہرتا تو بھلا کیا ہوتا

پا بہ جولاں نہ سہی جاتے مگر ہم بھی ضرور

صحن مقتل نے ہمیں بھی تو پکارا ہوتا

شہر کا شہر تمہیں دیکھنے آیا ہوا ہے

تم نہ آتے تو مری جان تماشا ہوتا

چشم پرنم بھی اگر حد سے تجاوز کرتی

خیمۂ خواب میں اک شور سا برپا ہوتا

یوں سر راہ تماشا نہ بناتے اس کا

نوک نیزہ پہ اگر کوئی تمہارا ہوتا

ہم محبت میں کوئی چال جو چلتے آصفؔ

وہ جو کہنے کو ہمارا ہے ہمارا ہوتا