shahr-e-dil kash ki ek shahr-e-tamanna hota

shahr-e-dil kaash ki ik shahr-e-tamannā hotā

yaar is dasht meñ koī to sahārā hotā

maiñ tire shahr se guzrā huuñ to hangāma huā

gar tire paas Thahartā to bhalā kyā hotā

pā-ba-jaulāñ na sahī jaate magar ham bhī zarūr

sahn-e-maqtal ne hameñ bhī to pukārā hotā

shahr kā shahr tumheñ dekhne aayā huā hai

tum na aate to mirī jaan tamāshā hotā

chashm-e-pur-nam bhī agar had se tajāvuz kartī

ḳhema-e-ḳhvāb meñ ik shor sā barpā hotā

yuuñ sar-e-rāh tamāshā na banāte us kā

nok-e-neza pe agar koī tumhārā hotā

ham mohabbat meñ koī chaal jo chalte 'āsif'

vo jo kahne ko hamārā hai hamārā hotā

shahr-e-dil kash ki ek shahr-e-tamanna hota

yar is dasht mein koi to sahaara hota

main tere shahr se guzra hun to hangama hua

gar tere pas Thaharta to bhala kya hota

pa-ba-jaulan na sahi jate magar hum bhi zarur

sahn-e-maqtal ne hamein bhi to pukara hota

shahr ka shahr tumhein dekhne aaya hua hai

tum na aate to meri jaan tamasha hota

chashm-e-pur-nam bhi agar had se tajawuz karti

KHema-e-KHwab mein ek shor sa barpa hota

yun sar-e-rah tamasha na banate us ka

nok-e-neza pe agar koi tumhaara hota

hum mohabbat mein koi chaal jo chalte 'asif'

wo jo kahne ko hamara hai hamara hota