shahr-e-dil kunj-e-bayaban nahin tha pahle

shahr-e-dil kunj-e-bayābān nahīñ thā pahle

maiñ kabhī itnā pareshān nahīñ thā pahle

baa.eñ pahlū meñ jo ik sañg paḌā hai sākit

ye dhaḌaktā bhī thā be-jān nahīñ thā pahle

shahryāroñ se marāsim the bahut hī gahre

tīra-baḳhtoñ se bhī anjān nahīñ thā pahle

lafz rūThe hue rahte the qalam se aksar

jin se tajdīd kā imkān nahīñ thā pahle

jab safar kaaT liyā hai to milā hai sab kuchh

saath mere koī sāmān nahīñ thā pahle

ab bhī be-nām basar hote haiñ auqāt mire

dil meñ tauqīr kā armān nahīñ thā pahle

aaj chādar ke barābar hai mire qad kī bisāt

maiñ kisī shahr kā sultān nahīñ thā pahle

khaa.e baiThā hai zamāne se ta.alluq kā fareb

tū 'alī' itnā to nādān nahīñ thā pahle

shahr-e-dil kunj-e-bayaban nahin tha pahle

main kabhi itna pareshan nahin tha pahle

baen pahlu mein jo ek sang paDa hai sakit

ye dhaDakta bhi tha be-jaan nahin tha pahle

shahryaron se marasim the bahut hi gahre

tira-baKHton se bhi anjaan nahin tha pahle

lafz ruThe hue rahte the qalam se aksar

jin se tajdid ka imkan nahin tha pahle

jab safar kaT liya hai to mila hai sab kuchh

sath mere koi saman nahin tha pahle

ab bhi be-nam basar hote hain auqat mere

dil mein tauqir ka arman nahin tha pahle

aaj chadar ke barabar hai mere qad ki bisat

main kisi shahr ka sultan nahin tha pahle

khae baiTha hai zamane se talluq ka fareb

tu 'ali' itna to nadan nahin tha pahle