shahr-e-jaan mein iztirab-e-soz-e-fan dekhega kaun

shahr-e-jāñ meñ iztirāb-e-soz-e-fan dekhegā kaun

mere andar ek qulzum maujzan dekhegā kaun

muzmahil sochoñ ke is jhulse hue māhaul meñ

terā husn-e-qāmat-e-sarv-e-saman dekhegā kaun

raat ne āñkhoñ meñ bhar diiñ is qadar tārīkiyāñ

sub.h to hogī magar pahlī kiran dekhegā kaun

apnī apnī aag meñ āñkheñ jhulas kar rah ga.iiñ

tere lab ke phuul terā bāñkpan dekhegā kaun

log to apne gharoñ meñ band ho kar rah ga.e

mere ḳhuuñ se surḳhī-e-shām-e-vatan dekhegā kaun

mere bāhar to sabā kā lams hai ḳhushbū bhī hai

mujh meñ aa kar mere andar kī ghuTan dekhegā kaun

log to pūjeñge ḳhud mere tarāshīda ḳhudā

kaun hai 'āzar' ḳhudā-e-fikr-o-fan dekhegā kaun

shahr-e-jaan mein iztirab-e-soz-e-fan dekhega kaun

mere andar ek qulzum maujzan dekhega kaun

muzmahil sochon ke is jhulse hue mahaul mein

tera husn-e-qamat-e-sarw-e-saman dekhega kaun

raat ne aankhon mein bhar din is qadar tarikiyan

subh to hogi magar pahli kiran dekhega kaun

apni apni aag mein aankhen jhulas kar rah gain

tere lab ke phul tera bankpan dekhega kaun

log to apne gharon mein band ho kar rah gae

mere KHun se surKHi-e-sham-e-watan dekhega kaun

mere bahar to saba ka lams hai KHushbu bhi hai

mujh mein aa kar mere andar ki ghuTan dekhega kaun

log to pujenge KHud mere tarashida KHuda

kaun hai 'azar' KHuda-e-fikr-o-fan dekhega kaun