shahr-e-KHirad se nur-e-sahar kaun le gaya

shahr-e-ḳhirad se nūr-e-sahar kaun le gayā

sub.h-e-safar se rāz-e-zafar kaun le gayā

āseb-e-ḳhauf de ke hudūd-e-nigāh ko

chehroñ ke sabz sabz nagar kaun le gayā

ḳhvāboñ kī ḳhaak ho ga.iiñ shādāb bastiyāñ

sūraj kī raushnī ko idhar kaun le gayā

bikhrī paḌī huī hai 'imārat yaqīn kī

fitnoñ kā shahr-e-dil meñ sharar kaun le gayā

kitnī sukūñ-navāz thī yaḳh-bastagī kī fasl

sho'loñ ke zard phuul magar kaun le gayā

samtoñ se kaT ke andhe safar par ho gāmzan

hosh-o-nigāh-o-'azm-o-jigar kaun le gayā

insāniyat ḳhulūs navāzish mohabbateñ

jismoñ ke sāya-dār shajar kaun le gayā

kartī thī kal jo jism fazā ko lahū lahū

'betāb' ab vo barq-e-nazar kaun le gayā

shahr-e-KHirad se nur-e-sahar kaun le gaya

subh-e-safar se raaz-e-zafar kaun le gaya

aaseb-e-KHauf de ke hudud-e-nigah ko

chehron ke sabz sabz nagar kaun le gaya

KHwabon ki KHak ho gain shadab bastiyan

suraj ki raushni ko idhar kaun le gaya

bikhri paDi hui hai 'imarat yaqin ki

fitnon ka shahr-e-dil mein sharar kaun le gaya

kitni sukun-nawaz thi yaKH-bastagi ki fasl

sho'lon ke zard phul magar kaun le gaya

samton se kaT ke andhe safar par ho gamzan

hosh-o-nigah-o-'azm-o-jigar kaun le gaya

insaniyat KHulus nawazish mohabbaten

jismon ke saya-dar shajar kaun le gaya

karti thi kal jo jism faza ko lahu lahu

'betab' ab wo barq-e-nazar kaun le gaya