shahr-e-tarab mein bechaini ke pahlu kaun KHaridega

shahr-e-tarab meñ bechainī ke pahlū kaun ḳharīdegā

dasht-e-jāñ kī ḳhātir ġham ke aahū kaun ḳharīdegā

table kī har thaap pe ḳhush haiñ sab lekin raqqāsa ke

paañv raqs meñ Tuut ga.e to ghuñghrū kaun ḳharīdegā

jism sabhī sandal jaise hoñ chehre hoñ phūloñ kī tarah

is 'ālam meñ mausam-e-gul se ḳhushbū kaun ḳharīdegā

jis bastī ke har āñgan meñ chāñd aur sūraj ugte haiñ

us bastī meñ raat huī to jugnū kaun ḳharīdegā

ab maiñ 'sham'' ye soch rahī huuñ sīm-o-zar kī bārish meñ

is patthar bastī meñ mere aañsū kaun ḳharīdegā

shahr-e-tarab mein bechaini ke pahlu kaun KHaridega

dasht-e-jaan ki KHatir gham ke aahu kaun KHaridega

table ki har thap pe KHush hain sab lekin raqqasa ke

panw raqs mein Tut gae to ghunghru kaun KHaridega

jism sabhi sandal jaise hon chehre hon phulon ki tarah

is 'alam mein mausam-e-gul se KHushbu kaun KHaridega

jis basti ke har aangan mein chand aur suraj ugte hain

us basti mein raat hui to jugnu kaun KHaridega

ab main 'sham ye soch rahi hun sim-o-zar ki barish mein

is patthar basti mein mere aansu kaun KHaridega