shahr-e-tohmat mein bahut der pukara hua hun

shahr-e-tohmat meñ bahut der pukārā huā huuñ

maiñ jo ik shaḳhs tire ahd kā maarā huā huuñ

mirī tanhā.ī mujhe roz tirā pūchhtī hai

maiñ jo duniyā ke muqābil tujhe haarā huā huuñ

munjamid thā maiñ kisī bahr-e-shumālī kī tarah

ik tire haath lagā dene se paarā huā huuñ

apnī barbādī kā jab jashn manāyā maiñ ne

phir kahīñ jā ke tujhe jaan se pyārā huā huuñ

har koī haath meñ talvār liye baiThā hai

maiñ to jaise kisī maqtal meñ utārā huā huuñ

sāmnā teġh-e-sitam kā hai mirā ik ma.amūl

shahr-e-ḳhūñ-bār se sau baar guzāra huā huuñ

maiñ kisī bād-e-ta'alluq kī hunar-kārī se

ret par naqsh kī mānind ubhārā huā huuñ

umr ik maiñ ne guzārī hai rah-e-tīra meñ

tab kahīñ jā ke maiñ 'shahzād' sitārā huā huuñ

shahr-e-tohmat mein bahut der pukara hua hun

main jo ek shaKHs tere ahd ka mara hua hun

meri tanhai mujhe roz tera puchhti hai

main jo duniya ke muqabil tujhe haara hua hun

munjamid tha main kisi bahr-e-shumali ki tarah

ek tere hath laga dene se para hua hun

apni barbaadi ka jab jashn manaya main ne

phir kahin ja ke tujhe jaan se pyara hua hun

har koi hath mein talwar liye baiTha hai

main to jaise kisi maqtal mein utara hua hun

samna tegh-e-sitam ka hai mera ek mamul

shahr-e-KHun-bar se sau bar guzara hua hun

main kisi baad-e-ta'alluq ki hunar-kari se

ret par naqsh ki manind ubhaara hua hun

umr ek main ne guzari hai rah-e-tira mein

tab kahin ja ke main 'shahzad' sitara hua hun