shahr-e-ulfat mein ba-juz jaan ka ziyan kuchh bhi nahin

shahr-e-ulfat meñ ba-juz jaañ kā ziyāñ kuchh bhī nahīñ

lauT chal ai dil-e-nādāñ ki yahāñ kuchh bhī nahīñ

ātish-e-ishq bujhī raakh uḌī duur talak

ab na sho.ala na sharāra na dhuāñ kuchh bhī nahīñ

shab ke sannāToñ meñ āvāra bhaTakte hī rahe

aur bhaTakne kā sabab bhī thā kahāñ kuchh bhī nahīñ

kis ajab moḌ pe gardish hameñ laa.ī ki jahāñ

apne hone kā yaqīñ hai na gumāñ kuchh bhī nahīñ

aisī rātoñ kā musāfir huuñ mire hisse meñ

chāñd kā nuur na tāroñ kā nishāñ kuchh bhī nahīñ

dil meñ gar baat koī hai to kaho baat ki hai

gar nahīñ hai to kaho saaf ki haañ kuchh bhī nahīñ

dhuup saa.e ko tarastī huī dekh aa.e haiñ

kuchh nahīñ aas ke sahrā meñ miyāñ kuchh bhī nahīñ

zindagī dasht kī mānind nazar aatī hai

jis kī qismat meñ zamistāñ na ḳhizāñ kuchh bhī nahīñ

koī qātil nahīñ maqtal pe paḌe haiñ taale

tum kahāñ jaate ho sāhib ki vahāñ kuchh bhī nahīñ

shahr-e-ulfat mein ba-juz jaan ka ziyan kuchh bhi nahin

lauT chal ai dil-e-nadan ki yahan kuchh bhi nahin

aatish-e-ishq bujhi rakh uDi dur talak

ab na shoala na sharara na dhuan kuchh bhi nahin

shab ke sannaTon mein aawara bhaTakte hi rahe

aur bhaTakne ka sabab bhi tha kahan kuchh bhi nahin

kis ajab moD pe gardish hamein lai ki jahan

apne hone ka yaqin hai na guman kuchh bhi nahin

aisi raaton ka musafir hun mere hisse mein

chand ka nur na taron ka nishan kuchh bhi nahin

dil mein gar baat koi hai to kaho baat ki hai

gar nahin hai to kaho saf ki han kuchh bhi nahin

dhup sae ko tarasti hui dekh aae hain

kuchh nahin aas ke sahra mein miyan kuchh bhi nahin

zindagi dasht ki manind nazar aati hai

jis ki qismat mein zamistan na KHizan kuchh bhi nahin

koi qatil nahin maqtal pe paDe hain tale

tum kahan jate ho sahib ki wahan kuchh bhi nahin