shahr ki hangama-arai se be-parwa hai wo

shahr kī hañgāma-ārā.ī se be-parvā hai vo

dhuup niklī hai to chaurāhe pe aa baiThā hai vo

chhū liyā gar bhuul se bhī to jhulas jā.egā haath

phuul jis ko aap ne samjhā hai angāra hai vo

mujrmoñ kī tarah maiñ apne makāñ meñ band huuñ

sar uThā.e be-gunāhoñ kī tarah phirtā hai vo

aao us ko khīñch laa.eñ shohratoñ ke shahr meñ

chhup ke kyoñ gumnāmiyoñ ke ġhaar meñ baiThā hai vo

bad-gumāñ hai mujh se lekin phir bhī merā dost hai

jab milā hai to gale mil kar bahut royā hai vo

tishnagī us kī bujhāne vaalā koī bhī nahīñ

sāmne panghaT ke baiThā hai magar pyāsā hai vo

dostī apnī jagah hai iḳhtilāf apnī jagah

aao us kī baat to sun aa.eñ kyā kahtā hai vo

ek muddat se 'azīz' aayā nahīñ hai is taraf

kyā ḳhabar kis haal meñ hai aur kyā kartā hai vo

shahr ki hangama-arai se be-parwa hai wo

dhup nikli hai to chaurahe pe aa baiTha hai wo

chhu liya gar bhul se bhi to jhulas jaega hath

phul jis ko aap ne samjha hai angara hai wo

mujrmon ki tarah main apne makan mein band hun

sar uThae be-gunahon ki tarah phirta hai wo

aao us ko khinch laen shohraton ke shahr mein

chhup ke kyon gumnamiyon ke ghaar mein baiTha hai wo

bad-guman hai mujh se lekin phir bhi mera dost hai

jab mila hai to gale mil kar bahut roya hai wo

tishnagi us ki bujhane wala koi bhi nahin

samne panghaT ke baiTha hai magar pyasa hai wo

dosti apni jagah hai iKHtilaf apni jagah

aao us ki baat to sun aaen kya kahta hai wo

ek muddat se 'aziz' aaya nahin hai is taraf

kya KHabar kis haal mein hai aur kya karta hai wo