shahr ko choT pe rakhti hai gajar mein koi chiz

shahr ko choT pe rakhtī hai gajar meñ koī chiiz

billiyāñ DhūñDhtī rahtī haiñ khañDar meñ koī chiiz

chaak haiñ zaḳhm ke paanī meñ havā meñ nāsūr

muTThiyāñ tol ke niklī hai safar meñ koī chiiz

bārhā āñkheñ ghanī kartā huuñ us pe phir bhī

chhūT rahtī hai nigah se gul-e-tar meñ koī chiiz

kabhī baiThak se rasoī kabhī dālān se chhat

bāvlī phirtī hai tujh bin mire ghar meñ koī chiiz

zindagī aag pe leTī huī parchhā.īñ hai kyā

bas dhuāñ detī hai har vaqt jigar meñ koī chiiz

shahr-e-sānī meñ shajar-kārī na kī dānista

phir nikal aa.e kahīñ barg-o-samar meñ koī chiiz

hashr tak jiitī raheñgī mirī ġhazleñ 'tafzīl'

oxigen sī labālab hai hunar meñ koī chiiz

shahr ko choT pe rakhti hai gajar mein koi chiz

billiyan DhunDhti rahti hain khanDar mein koi chiz

chaak hain zaKHm ke pani mein hawa mein nasur

muTThiyan tol ke nikli hai safar mein koi chiz

barha aankhen ghani karta hun us pe phir bhi

chhuT rahti hai nigah se gul-e-tar mein koi chiz

kabhi baiThak se rasoi kabhi dalan se chhat

bawli phirti hai tujh bin mere ghar mein koi chiz

zindagi aag pe leTi hui parchhain hai kya

bas dhuan deti hai har waqt jigar mein koi chiz

shahr-e-sani mein shajar-kari na ki danista

phir nikal aae kahin barg-o-samar mein koi chiz

hashr tak jiti rahengi meri ghazlen 'tafzil'

oxigen si labaalab hai hunar mein koi chiz