shahr mein insaf kya achchha hua

shahr meñ insāf kyā achchhā huā

aap sachche aur maiñ jhūTā huā

ho gayā vo be-niyāz-e-do-jahāñ

ai ḳhayāl-e-yār jo terā huā

rang-e-ruḳh hai tarjumān-e-vasl-e-ġhair

zulf-e-barham se to pūchho kyā huā

tham zarā ai dīda-e-ḳhūñ-bār aaj

dekh to ye kaun hai baiThā huā

aag bhaḌkāne ko niklī dil se aah

tuur par jo kuchh huā thoḌā huā

ik taḌap meñ aur vo betāb hoñ

tū bhī ai dard-e-jigar itnā huā

siikh le ham se koī andāz-e-ishq

so tirā ye rang hai bartā huā

uTh gayā jab un ke chehre se naqāb

zarra zarra dīda-e-bīnā huā

ek hangāma thā un ko chāhnā

aqrabā meñ hashr sā barpā huā

saañs ukhḌā nabz chhūTī maiñ chalā

haa.e tum ab tak na samjhe kyā huā

shāhid-o-mīnā muqaddar meñ nahīñ

bā-ḳhudā 'nāzish' abas paidā huā

shahr mein insaf kya achchha hua

aap sachche aur main jhuTa hua

ho gaya wo be-niyaz-e-do-jahan

ai KHayal-e-yar jo tera hua

rang-e-ruKH hai tarjuman-e-wasl-e-ghair

zulf-e-barham se to puchho kya hua

tham zara ai dida-e-KHun-bar aaj

dekh to ye kaun hai baiTha hua

aag bhaDkane ko nikli dil se aah

tur par jo kuchh hua thoDa hua

ek taDap mein aur wo betab hon

tu bhi ai dard-e-jigar itna hua

sikh le hum se koi andaz-e-ishq

so tera ye rang hai barta hua

uTh gaya jab un ke chehre se naqab

zarra zarra dida-e-bina hua

ek hangama tha un ko chahna

aqraba mein hashr sa barpa hua

sans ukhDa nabz chhuTi main chala

hae tum ab tak na samjhe kya hua

shahid-o-mina muqaddar mein nahin

ba-KHuda 'nazish' abas paida hua