shahr mein rah kar yahi socha hai bas barsat mein

shahr meñ rah kar yahī sochā hai bas barsāt meñ

jaane kitne ghar gireñ ab ke baras barsāt meñ

khiḌkiyāñ jangal meñ chaltī rail kī sab khol do

ye havā ye miTTī aur paanī kā mas barsāt meñ

apne ehsāsāt ke tāroñ ko yuuñ Dhīlā na chhoḌ

apnī nas-nas kī tarah un ko bhī kas barsāt meñ

baj rahe haiñ dhīme-dhīme āñganoñ meñ jal-tarañg

mīThī-mīThī sī hai kamroñ meñ umas barsāt meñ

merī nas-nas meñ utartī jā rahī haiñ būñdiyāñ

aur sulagtā jā rahā hai har nafas barsāt meñ

'ishq kī taqdīs ko ab ik taraf rakh dījiye

'ishq ke rutbe ko pahuñchī hai havas barsāt meñ

bas tanāvar peḌ hī rah jā.eñge sīdhe khaḌe

baaqī sab bah jā.eñge ye ḳhār-o-ḳhas barsāt meñ

vaqt se pahle qafas kī tīliyoñ se sar na phoḌ

tinke-tinke ho ke bikhregā qafas barsāt meñ

bādaloñ kī gaḌgaḌāhaT meñ rajaz-ḳhvānī kī shaan

aur bijlī kī kaḌak hai dair-ras barsāt meñ

taur us ke bhī badalte rahte haiñ mausam ke saath

hai taġhāful sāl-bhar aur pesh-o-pas barsāt meñ

shahr mein rah kar yahi socha hai bas barsat mein

jaane kitne ghar giren ab ke baras barsat mein

khiDkiyan jangal mein chalti rail ki sab khol do

ye hawa ye miTTi aur pani ka mas barsat mein

apne ehsasat ke taron ko yun Dhila na chhoD

apni nas-nas ki tarah un ko bhi kas barsat mein

baj rahe hain dhime-dhime aanganon mein jal-tarang

miThi-miThi si hai kamron mein umas barsat mein

meri nas-nas mein utarti ja rahi hain bundiyan

aur sulagta ja raha hai har nafas barsat mein

'ishq ki taqdis ko ab ek taraf rakh dijiye

'ishq ke rutbe ko pahunchi hai hawas barsat mein

bas tanawar peD hi rah jaenge sidhe khaDe

baqi sab bah jaenge ye KHar-o-KHas barsat mein

waqt se pahle qafas ki tiliyon se sar na phoD

tinke-tinke ho ke bikhrega qafas barsat mein

baadalon ki gaDgaDahaT mein rajaz-KHwani ki shan

aur bijli ki kaDak hai dair-ras barsat mein

taur us ke bhi badalte rahte hain mausam ke sath

hai taghaful sal-bhar aur pesh-o-pas barsat mein