shahr mein raushaniyan ghar mein ujale kam hain

shahr meñ raushaniyāñ ghar meñ ujāle kam haiñ

jal uTheñ aa ki bahut haiñ ye havāle kam haiñ

rāh-e-haq pahle se mushkil nazar aatī hai hameñ

ḳhush na ho koī agar paañv meñ chhāle kam haiñ

ghar tasavvur meñ agar hai to saḌak par aa jā

aur vo bol jise bolne vaale kam haiñ

haiñ udhar vo ki jo zālim bhī haiñ shaddād bhī haiñ

aur idhar vo haiñ ki jo TūTne vaale kam haiñ

hākim-e-shahr hameñ itnā bhī majbūr na kar

faisle kar liye ham ne jo vo Taale kam haiñ

itnī tārīk fazā pahle kabhī thī hī nahīñ

ham ne jitne bhī charāġh ab ke uchhāle kam haiñ

ai vatan jin ko ye lagtā hai ki sab Thiik hai vo

aur kuchh hoñge tire chāhne vaale kam haiñ

shahr mein raushaniyan ghar mein ujale kam hain

jal uThen aa ki bahut hain ye hawale kam hain

rah-e-haq pahle se mushkil nazar aati hai hamein

KHush na ho koi agar panw mein chhaale kam hain

ghar tasawwur mein agar hai to saDak par aa ja

aur wo bol jise bolne wale kam hain

hain udhar wo ki jo zalim bhi hain shaddad bhi hain

aur idhar wo hain ki jo TuTne wale kam hain

hakim-e-shahr hamein itna bhi majbur na kar

faisle kar liye hum ne jo wo Tale kam hain

itni tarik faza pahle kabhi thi hi nahin

hum ne jitne bhi charagh ab ke uchhaale kam hain

ai watan jin ko ye lagta hai ki sab Thik hai wo

aur kuchh honge tere chahne wale kam hain