shahr mein ruk sa gaya kar-e-jahan tere baad

shahr meñ ruk sā gayā kār-e-jahāñ tere baad

kyā batā.ūñ ki gayā kaun kahāñ tere baad

chīḳhte phirte haiñ sannāTe khulī saḌkoñ par

na rahā koī bhī ābād makāñ tere baad

aañkh se aaTh pahar ashk mire bahte haiñ

dil se uThne lagā rah rah ke dhuāñ tere baad

har taraf baat tirī yaad tirī fikr tirī

jaag uTThe tirī furqat ke nishāñ tere baad

pūchhnā chāhūñgā gar tū jo kahīñ mil jaa.e

be-zabāñ ho ga.e kyoñ ahl-e-zabāñ tere baad

hasrateñ dil meñ sulagtī haiñ mire āḳhir-e-shab

apne hone kā bhī baaqī na gumāñ tere baad

mubtalā 'raaj to hai dukh meñ terī furqat ke

shahr meñ kyoñ na rahā amn-o-amāñ tere baad

shahr mein ruk sa gaya kar-e-jahan tere baad

kya bataun ki gaya kaun kahan tere baad

chiKHte phirte hain sannaTe khuli saDkon par

na raha koi bhi aabaad makan tere baad

aankh se aaTh pahar ashk mere bahte hain

dil se uThne laga rah rah ke dhuan tere baad

har taraf baat teri yaad teri fikr teri

jag uTThe teri furqat ke nishan tere baad

puchhna chahunga gar tu jo kahin mil jae

be-zaban ho gae kyon ahl-e-zaban tere baad

hasraten dil mein sulagti hain mere aaKHir-e-shab

apne hone ka bhi baqi na guman tere baad

mubtala 'raj to hai dukh mein teri furqat ke

shahr mein kyon na raha amn-o-aman tere baad