shahr mein tere mera koi shanasa bhi nahin

shahr meñ tere mirā koī shanāsā bhī nahīñ

kaun huuñ maiñ ye kisī shaḳhs ne pūchhā bhī nahīñ

husn-e-maġhrūr ko āñkhoñ meñ basāyā bhī nahīñ

hirs kā zahr mirī ruuh meñ utrā bhī nahīñ

us kī yādoñ se munavvar huī dil kī duniyā

chāñd aisā jo abhī abr se niklā bhī nahīñ

apnī marzī se qafas ham ne chunā thā sayyād

is liye tere sitam kā hameñ shikva bhī nahīñ

daur-daura hai yahāñ jaur-o-jafā kā lekin

dosto ahl-e-vafā shahr meñ anqā bhī nahīñ

gulsitāñ kaise tujhe sauñp deñ ai dushman-e-gul

is meñ shāmil to tire ḳhuun kā qatra bhī nahīñ

nāḳhudā ġhair kī kashtī kā tujhe kyoñ ġham hai

duur girdāb se kuchh terā safīna bhī nahīñ

pārsā go ki nahīñ 'sābir'-e-ḳhasta lekin

aap jaisā use samjhe haiñ to vaisā bhī nahīñ

shahr mein tere mera koi shanasa bhi nahin

kaun hun main ye kisi shaKHs ne puchha bhi nahin

husn-e-maghrur ko aankhon mein basaya bhi nahin

hirs ka zahr meri ruh mein utra bhi nahin

us ki yaadon se munawwar hui dil ki duniya

chand aisa jo abhi abr se nikla bhi nahin

apni marzi se qafas hum ne chuna tha sayyaad

is liye tere sitam ka hamein shikwa bhi nahin

daur-daura hai yahan jaur-o-jafa ka lekin

dosto ahl-e-wafa shahr mein anqa bhi nahin

gulsitan kaise tujhe saunp den ai dushman-e-gul

is mein shamil to tere KHun ka qatra bhi nahin

naKHuda ghair ki kashti ka tujhe kyon gham hai

dur girdab se kuchh tera safina bhi nahin

parsa go ki nahin 'sabir'-e-KHasta lekin

aap jaisa use samjhe hain to waisa bhi nahin