shahron ki samt ganw se aage nikal gae

shahroñ kī samt gaañv se aage nikal ga.e

jazbāt mere paañv se aage nikal ga.e

āġhāz meñ chale the to beTe the sāth-sāth

kuchh duur chal ke maaoñ se aage nikal ga.e

sar pe paḌī jo dhuup to jaanā ki yaar ham

peḌoñ kī sard chhāoñ se aage nikal ga.e

hotā bhī vo ba-dast-e-du'ā kis ke vāste

jab ham hī sab du'āoñ se aage nikal ga.e

itnā Thaharnā paḌ gayā ḳhāmoshiyoñ ke saath

har shaḳhs kī sadāoñ se aage nikal ga.e

mardūd kyoñ na hote jin atrāf kā thā hukm

ham log un dishāoñ se aage nikal ga.e

'sādiq' pukāriye na inheñ ab ye dasht-zād

zulfoñ kī nam ghaTāoñ se aage nikal ga.e

shahron ki samt ganw se aage nikal gae

jazbaat mere panw se aage nikal gae

aaghaz mein chale the to beTe the sath-sath

kuchh dur chal ke maon se aage nikal gae

sar pe paDi jo dhup to jaana ki yar hum

peDon ki sard chhaon se aage nikal gae

hota bhi wo ba-dast-e-du'a kis ke waste

jab hum hi sab du'aon se aage nikal gae

itna Thaharna paD gaya KHamoshiyon ke sath

har shaKHs ki sadaon se aage nikal gae

mardud kyon na hote jin atraf ka tha hukm

hum log un dishaon se aage nikal gae

'sadiq' pukariye na inhen ab ye dasht-zad

zulfon ki nam ghaTaon se aage nikal gae