shaiKH maiKHane se jab su-e-haram aate hain

shaiḳh maiḳhāne se jab sū-e-haram aate haiñ

sar jhukā.e hue bā-dīda-e-nam aate haiñ

ahl-e-gulshan to hazāroñ haiñ muqaddar se magar

barq ke sāmne aate haiñ to ham aate haiñ

phir bhī be-tābī-e-dil khīñch ke le jaatī hai

go tirī bazm se ham khā ke qasam aate haiñ

rāsta ziist kā pur-pech nazar aatā hai

jab ḳhayāloñ meñ tirī zulf ke ḳham aate haiñ

muḳhlisāna tire andāz nahīñ haiñ saaqī

ham tirī bazm meñ is vāste kam aate haiñ

vo 'abas karte haiñ mahrūmī-e-qismat kā gila

jo tirī bazm meñ begāna-e-ġham aate haiñ

dil-e-nākām ko miltā hai umīdoñ kā payām

jab kabhī manzil-e-maqsūd pe ham aate haiñ

kis tarah husn pe ā.īna ho hālat merī

naala karne ke tarīqe mujhe kam aate haiñ

husn kī zad se koī dil ko bachā.e kyūñkar

un ke tiir ab to ba-andāz-e-karam aate haiñ

apnā markaz hī samajh rakkhā ho jaise 'ishrat'

yuuñ mire dil kī taraf ranj-o-alam aate haiñ

shaiKH maiKHane se jab su-e-haram aate hain

sar jhukae hue ba-dida-e-nam aate hain

ahl-e-gulshan to hazaron hain muqaddar se magar

barq ke samne aate hain to hum aate hain

phir bhi be-tabi-e-dil khinch ke le jati hai

go teri bazm se hum kha ke qasam aate hain

rasta zist ka pur-pech nazar aata hai

jab KHayalon mein teri zulf ke KHam aate hain

muKHlisana tere andaz nahin hain saqi

hum teri bazm mein is waste kam aate hain

wo 'abas karte hain mahrumi-e-qismat ka gila

jo teri bazm mein begana-e-gham aate hain

dil-e-nakaam ko milta hai umidon ka payam

jab kabhi manzil-e-maqsud pe hum aate hain

kis tarah husn pe aaina ho haalat meri

nala karne ke tariqe mujhe kam aate hain

husn ki zad se koi dil ko bachae kyunkar

un ke tir ab to ba-andaz-e-karam aate hain

apna markaz hi samajh rakkha ho jaise 'ishrat'

yun mere dil ki taraf ranj-o-alam aate hain