shaiKH-o-waiz ko KHudara ham-nashin mat kijiye

shaiḳh-o-vā.iz ko ḳhudārā ham-nashīñ mat kījiye

kaam jo shāyān-e-ahl-e-dil nahīñ mat kījiye

dekhiye bas ye ki izn-e-chashm-e-jānāna hai kyā

'ishq hai to imtiyāz-e-kufr-o-dīñ mat kījiye

Daal deñ jo dil ke darvāzoñ pe be-mehrī ke qufl

jī meñ aisī ārzūoñ ko makīñ mat kījiye

zehn meñ zauq-e-gumāñ kī bhī na gunjā.ish rahe

is qadar tauhīn-e-ādāb-e-yaqīñ mat kījiye

shauq se ho lījiye ahl-e-junūñ ke saath saath

haañ magar phir fikr-e-jeb-o-āstīñ mat kījiye

hai lagan to kījiye sahrā-navardī misl-e-qais

sirf zikr-e-lailā-e-mahmil-nashīñ mat kījiye

dasht meñ kho jā.iye jangal meñ jā basiye magar

ruuh ko bahr-e-ḳhudā uzlat-guzīñ mat kījiye

muskurā kar Taal diije dād-ḳhvāh-e-shauq ko

haañ agar mumkin nahīñ hai to nahīñ mat kījiye

lutf kā tālib hai māl-o-zar kā saudā.ī nahīñ

apne saa.il par nigāh-e-ḳhashm-gīñ mat kījiye

'ishq ke baare meñ nā-mahram jo kahte haiñ kahīñ

ḳhanda-peshānī se sun liije yaqīñ mat kījiye

shaiKH-o-waiz ko KHudara ham-nashin mat kijiye

kaam jo shayan-e-ahl-e-dil nahin mat kijiye

dekhiye bas ye ki izn-e-chashm-e-jaanana hai kya

'ishq hai to imtiyaz-e-kufr-o-din mat kijiye

Dal den jo dil ke darwazon pe be-mehri ke qufl

ji mein aisi aarzuon ko makin mat kijiye

zehn mein zauq-e-guman ki bhi na gunjaish rahe

is qadar tauhin-e-adab-e-yaqin mat kijiye

shauq se ho lijiye ahl-e-junun ke sath sath

han magar phir fikr-e-jeb-o-astin mat kijiye

hai lagan to kijiye sahra-nawardi misl-e-qais

sirf zikr-e-laila-e-mahmil-nashin mat kijiye

dasht mein kho jaiye jangal mein ja basiye magar

ruh ko bahr-e-KHuda uzlat-guzin mat kijiye

muskura kar Tal dije dad-KHwah-e-shauq ko

han agar mumkin nahin hai to nahin mat kijiye

lutf ka talib hai mal-o-zar ka saudai nahin

apne sail par nigah-e-KHashm-gin mat kijiye

'ishq ke bare mein na-mahram jo kahte hain kahin

KHanda-peshani se sun lije yaqin mat kijiye