shajar hun dhup ki zad par kisi ka saeban hun

shajar huuñ dhuup kī zad par kisī kā sā.ebāñ huuñ

kisī bhī vaqt miT saktā hai jo aisā nishāñ huuñ

mire atrāf jitnī bhī haiñ manfī quvvateñ haiñ

kisī kī zid ke aur apnī anā ke darmiyāñ huuñ

maiñ jazbe kī chamaktī lau se raushan ho ga.ī thī

aur ab us jazba-e-be-ḳhānumāñ hī kā dhuāñ huuñ

phir us ke baad rasta kyā ho mujh ko sochnā hai

abhī tak to ḳhabar hai kis jagah par huuñ kahāñ huuñ

kisī ke hukm ke taabe muayyan rāste par

jo ruk ke dam bhī le saktā nahīñ vo kārvāñ huuñ

mirā māhaul mere vāste bhī ajnabī hai

maiñ ik kachchī galī ke moḌ par puḳhta makāñ huuñ

mujhe us kī nazar se dekh kar ye jānñā hai

yaqīñ huuñ yā yaqīñ ke aa.ine meñ bhī gumāñ huuñ

shajar hun dhup ki zad par kisi ka saeban hun

kisi bhi waqt miT sakta hai jo aisa nishan hun

mere atraf jitni bhi hain manfi quwwaten hain

kisi ki zid ke aur apni ana ke darmiyan hun

main jazbe ki chamakti lau se raushan ho gai thi

aur ab us jazba-e-be-KHanuman hi ka dhuan hun

phir us ke baad rasta kya ho mujh ko sochna hai

abhi tak to KHabar hai kis jagah par hun kahan hun

kisi ke hukm ke tabe muayyan raste par

jo ruk ke dam bhi le sakta nahin wo karwan hun

mera mahaul mere waste bhi ajnabi hai

main ek kachchi gali ke moD par puKHta makan hun

mujhe us ki nazar se dekh kar ye jaanna hai

yaqin hun ya yaqin ke aaine mein bhi guman hun