shajar ki shaKH se jhula utar bhi sakta hai

shajar kī shāḳh se jhūlā utar bhī saktā hai

tire baġhair ye sāvan guzar bhī saktā hai

sameT rakkhā hai apnā vajūd ḳhud maiñ ne

ye aa.ina jo girā to bikhar bhī saktā hai

kabhī kabhī hameñ milne kā izn de kar vo

hamārī zaat pe ehsān kar bhī saktā hai

tamāsha yuuñ na dikhā apnī be-niyāzī kā

hamāre sabr kā paimāna bhar bhī saktā hai

vo jis ko da.avā hai tūfāñ kā ruḳh badal degā

kabhī kabhī kisī āñdhī se Dar bhī saktā hai

kahā thā us ne ki milne zarūr aa.egā

magar vo va.ade se apne mukar bhī saktā hai

baḌe salīqe se sab ko sambhāl rakkhā hai

zarā sī chuuk se kumba bikhar bhī saktā hai

duā.eñ māñgtī rahtī huuñ roz-o-shab rab se

agar vo chāhe muqaddar sañvar bhī saktā hai

shajar ki shaKH se jhula utar bhi sakta hai

tere baghair ye sawan guzar bhi sakta hai

sameT rakkha hai apna wajud KHud main ne

ye aaina jo gira to bikhar bhi sakta hai

kabhi kabhi hamein milne ka izn de kar wo

hamari zat pe ehsan kar bhi sakta hai

tamasha yun na dikha apni be-niyazi ka

hamare sabr ka paimana bhar bhi sakta hai

wo jis ko dawa hai tufan ka ruKH badal dega

kabhi kabhi kisi aandhi se Dar bhi sakta hai

kaha tha us ne ki milne zarur aaega

magar wo wade se apne mukar bhi sakta hai

baDe saliqe se sab ko sambhaal rakkha hai

zara si chuk se kumba bikhar bhi sakta hai

duaen mangti rahti hun roz-o-shab rab se

agar wo chahe muqaddar sanwar bhi sakta hai